झारखंडमधील गरवा जिल्ह्यातील शाळेत विद्यार्थ्यांना दारू वाटण्यात आल्याचा खळबळजनक प्रकार उघडकीस आला आहे. 'पीपल्स युनियन फॉर सिव्हिल लिबर्टी'(पीयूसीएल) या पाच जणांच्या पथकाने जिल्ह्यातील कुदरूम जनजातीय आवासीय विद्यालयात छापा मारला असता हा प्रकार उघडकीस आला आहे. इतकेच नव्हे, तर या निवासी शाळेतील विद्यार्थ्यांना अश्लील चित्रफितीही दाखविल्या जात असल्याचा आरोप 'पीयूसीएल'चे सदस्य सुरेश मानस यांनी केला आहे. धक्कादायक बाब म्हणजे, शाळेचे मुख्याध्यापक गणेशसिंह मुंडा यांनी या प्रकाराची पाठराखण करत 'शिक्षक काय किंवा विद्यार्थी काय, सर्वच गावकरी दारू पितात' असे अजब तर्कट मांडले आहे. तसेच येथील दोन शिक्षकांना वगळता इतर सर्वच दारु पितात असेही मुंडा म्हणाले. दरम्यान, 'पीयूसीएल' या संपूर्ण प्रकरणाचा अहवाल राज्य सरकारकडे त्वरित पाठविणार असून झारखंडचे ग्रामविकास मंत्री के. एन. त्रिपाठी यांनी या प्रकरणी चौकशीचे आदेश सुद्धा दिले आहेत.
