मुंबईतील निवासी भागांमध्ये फटाक्यांच्या विक्रीला बंदी; हायकोर्टाचे आदेश

फटाक्यांची विक्री करणारे अनधिकृत स्टॉल्स आणि निवासी भागातील फटाक्यांचे स्टॉल्स यासंबंधी सर्वोच्च न्यायालयाच्या निर्देशांची अंमलबाजवणी करा, असे न्यायालयाने म्हटले आहे. त्यामुळे रहिवासी भागात फटाके विक्री करण्यावर बंदी येणार आहे. तसेच ज्यांचे विक्री परवाने निवासी भागात आहेत त्यांचे परवाने तातडीने रद्द करण्यात यावे, असेही न्यायालयाने स्पष्ट केले आहे. सरकारी आकडेवारीनुसार प्रशासनाकडून मुंबईत केवळ ८७ परवानाधारक फटाके विक्रेते आहेत. यापैकी कायमस्वरूपी फटाक्यांचा व्यवसाय करणाऱ्या परवान्यांची संख्या ६२ इतकी आहे, तर दिवाळीच्या काळात देण्यात येणाऱ्या परवान्यांची संख्या २५ इतकी आहे. परंतु, या परवान्यांची संख्याही निम्म्याने कमी करावी, असे निर्देश न्यायालयाने दिले आहेत.