दापोडीतील लष्करी अभियांत्रिकी महाविद्यालयाने बंद केलेला रस्ता पुन्हा सुरू करण्यासाठी बोपखेलच्या ग्रामस्थांनी केलेल्या आंदोलनाला हिंसक वळण लावून भडकलेल्या दंगलीत ग्रामस्थांच्या हल्ल्यात जखमी झालेल्या पोलीस कर्मचाऱ्याचा शुक्रवारी मृत्यू झाला.
रामदास बांगर, असे मृत्यू झालेल्या पोलीस कर्मचाऱ्याचे नाव आहे. बोपखेलमधून दापोडीकडे जाण्यासाठी लष्करी हद्दीतून असलेला रस्ता लष्करी अभियांत्रिकी महाविद्यालयाने बंद केल्यानंतर ग्रामस्थांनी २१ मे रोजी त्या विरोधात आंदोलन केले. या आंदोलनाला हिंसक वळण लागून पोलीस व ग्रामस्थांमध्ये धुमश्चक्री उडाली होती. पोलिसांकडून लाठीमार, तर ग्रामस्थांकडूनही पोलिसांवर हल्लाबोल करण्यात आला होता. त्यात बांगर गंभीर जखमी झाले होते.
बांगर यांच्यावर सुरुवातीला भोसरी येथील एका खासगी रुग्णालयात उपचारक करण्यात आले होते. प्रकृती सुधारली असल्याने आठ दिवसांनी त्यांना घरी सोडण्यात आले होते. मात्र, घरी गेल्यानंतर त्यांना पुन्हा त्रास सुरू झाला. त्यामुळे त्यांना पुण्यातील खासगी रुग्णालयात दाखल करण्यात आले. तेथे त्यांच्यावर मागील अडीच महिन्यांपासून उपचार सुरू होते. शुक्रवारी दुपारी उपचार सुरू असताना त्यांचा मृत्यू झाला.
