रुपयाचा स्फोट; बाजार तळात

डॉलर
रिझव्‍‌र्ह बँकेच्या विदेशी चलनाचा देशाबाहेर विसर्ग रोखण्यासाठी र्निबधांचे चलन बाजारातही पडसाद उमटले. भारतीय चलनाने बुधवारअखेर ६१.४३ चा स्तर गाठताना ऐतिहासिक नीचांक नोंदविलाच होता. तर स्वातंत्र्य दिनाच्या सुट्टीनं व्यवहार झालेल्या सलग दुसऱ्या दिवशी त्याने नवीन नीचांक दाखविला. बुधवारच्या तुलनेत आणखी २२ पैशांनी खालावत रुपयाने प्रति डॉलर ६१.६५ अशा विक्रमी नीचांकाला आज गाठले. दिवसाच्या मध्यान्हाला तर त्याने ६२.०३ असा अभूतपूर्व तळ दाखवून शेअर बाजारात भीतीचे तरंग पोहचविले.

निर्देशांक
घसरणीसह खुल्या झालेल्या निर्देशांकांची घसरण वाढतच गेली, दिवसअखेर सेन्सेक्समध्ये ७६९.४१ (३.९७%) अंशांच्या तुटीने तर
निफ्टीत २३४.४५ अंशांच्या हानीसह ती स्थिरावली.
रिझव्‍‌र्ह बँकेच्या उपायांनंतरही रुपयाचे अवमूल्यन होत असल्याने, पतमानांकन घटविले जाण्याच्या भीतीने बाजारातील थरकाप आणखी वाढविला.
परिणाम : बाजारातील पडझडीने सुमारे दोन लाख कोटी रुपयांचे गुंतवणूक मूल्य मातीमोल झाले. सेन्सेक्समधील ३० पैकी २९ कंपन्यांच्या समभागांमध्ये १० टक्क्यांपर्यंत घसरण दिसली, तर बाजारातील प्रत्येक १० समभागांपैकी सहा समभाग घसरणपंथाला होते.

सोन्याला तोळ्यामागे ३०,६९५ पर्यंत लकाकी!
गडगडलेल्या शेअर बाजाराचा फायदा सराफ बाजारात तेजीच्या रूपाने शुक्रवारी दिसून आला. ईदपासून गेला सलग आठवडाभर सुरू असलेल्या मौल्यवान धातूंच्या तेजीला शुक्रवारी  झळाळी चढली.
मुंबईच्या सराफ बाजारात ९९.५ टक्के शुद्धतेचे स्टँडर्ड सोने तोळ्यामागे शुक्रवारी एकदम १,१७५ रुपयांनी वाढून ३०,६९७ रुपयांवर गेले.  चांदीच्या दरातही एकाच दिवसातील व्यवहारात जवळपास ३ हजार रुपयांची वाढ नोंदली गेली आणि किलोमागे रु.४९,९८० पर्यंत तिचा भाव जाऊन धडकला.
सोने हव्यासावर र्निबध म्हणून १० टक्क्यांपर्यंत आयात शुल्कवाढीचे सरकारचा निर्णय आणि रिझव्‍‌र्ह बँकेच्या आयातीला बांध घालणाऱ्या उपायानंतरही, सोन्याच्या मागणीने सरलेल्या तिमाहीत दशकातील उच्चांक गाठल्याचा ‘जागतिक सुवर्ण परिषदे’ने काल जाहीर केलेल्या अहवालात स्पष्ट झाले.