‘जीएसटी’ संकलन १.५२ लाख कोटींवर ; सलग आठव्या महिन्यात १.४० लाख कोटींपुढे मजल

दसरा-दिवाळी असा मुख्य सणांचा हंगाम तसेच वस्तू व सेवांच्या दरवाढीसह, त्यांची बळावलेली मागणी आणि व्यापाऱ्यांकडून वाढलेले कर-अनुपालन याच्या एकत्रित परिणामामुळे ऑक्टोबर महिन्यात जीएसटी संकलनाने दीड लाख कोटी रुपयांचा टप्पा गाठला आहे. चालू आर्थिक वर्षांत दुसऱ्यांदा एकूण संकलन दीड लाख कोटी रुपयांपेक्षा अधिक राहिले आहे. या आधी चालू वर्षांत एप्रिलमध्ये एकूण १ लाख ६७ हजार ५४० कोटी रुपयांचे जीएसटी संकलन झाले होते. तर गेल्या वर्षी याच महिन्यात, म्हणजेच ऑक्टोबर २०२१ मध्ये १.३० लाख कोटींचा करापोटी महसूल मिळाला होता.