देशात मुलींच्या कल्याणासाठी अनेक योजना आहेत. परंतु सुकन्या समृद्धी या योजनेत गुंतवणूक केल्यास तुमच्या मुलीच्या शिक्षणापासून ते लग्नापर्यंतचा सर्व खर्च भागवता येईल. ही योजना वार्षिक ७.६% व्याजदर देते. ही योजना पोस्ट ऑफिसमधूनही सुरू करता येईल. या योजनेद्वारे, तुम्हाला आयकर नियमांनुसार १.५ लाख रुपयांपर्यंत कर सूट मिळते. याचा अर्थ तुम्ही दरवर्षी १.५ लाख रुपये गुंतवून कर सूट मिळवू शकता. त्याचबरोबर त्यावर मिळणारा रिटर्नही करमुक्त असतो. सुकन्या समृद्धी योजनेअंतर्गत, तुम्ही तुमच्या मुलीचा जन्म झाल्यापासून तिचे वय १० वर्षांपेक्षा कमी असेपर्यंत खाते उघडू शकता. हे खाते २५० रुपयांच्या वार्षिक किमान प्रीमियमवर उघडता येते. ही योजना सुरू झाली तेव्हा किमान वार्षिक प्रीमियम १००० रुपये होता. तर कमाल मर्यादा वार्षिक १.५ लाख रुपये आहे. तुम्ही तुमच्या मुलीचे खाते पोस्ट ऑफिस आणि बँक या दोन्ही ठिकाणी उघडू शकता. हे खाते उघडल्याच्या तारखेपासून २१ वर्षे सुरू ठेवता येते. मुलगी १८ वर्षांची झाल्यानंतर यातून ५० टक्के रक्कम शिक्षणासाठी काढता येते.
सुकन्या खाते उघडण्यासाठी तुम्ही तुमच्या मुलीचे जन्म प्रमाणपत्र बँक आणि पोस्ट ऑफिसला देणे आवश्यक आहे. या एका कागदपत्राशिवाय खाते उघडता येणार नाही. याशिवाय पालकांना त्यांचे ओळखपत्रही द्यावे लागणार आहे. तसेच हे खाते किमान २५० रुपयांमध्ये उघडता येते. त्यानंतर खात्यात १०० रुपयांच्या पटीत जमा करावे लागतात. सुकन्या समृद्धी खाते उघडल्यानंतर, तुम्हाला १५ वर्षे नियमितपणे गुंतवणूक करावी लागेल. त्यानंतर तुम्हाला ६ वर्षे व्याज मिळत राहील. उदाहरणार्थ, जर तुमची मुलगी ५ वर्षांची असेल, तर तुम्हाला २० वर्षे वयापर्यंत गुंतवणूक करावी लागेल. त्यानंतर, पुढील ६ वर्षे व्याज जमा होत राहील आणि मॅच्युरिटी कालावधी संपल्यानंतर संपूर्ण रक्कम मिळेल.
Sukanya Samriddhi Yojana: सुकन्या समृद्धी योजनेतून मुलीसाठी मिळवा १५ लाख रुपये, कसं ते जाणून घ्या
सुकन्या समृद्धी खात्यातील किमान शिल्लक न ठेवल्याने खाते अनियमित होते. नियमित करण्यासाठी दरवर्षी ५० रुपये दंड भरावा लागतो. त्याच वेळी तुम्हाला योजनेची किमान रक्कम देखील भरावी लागेल. जर तुम्ही दंड भरला नाही, तर तुमचे खाते बचतीमध्ये रूपांतरित होईल आणि तुम्हाला बचत खात्याचे ४ टक्के व्याज मिळेल. सुकन्या समृद्धी योजनेत तुम्ही दरमहा ३००० रुपये जमा केले तर एका वर्षात तुम्ही ३६,००० रुपये जमा करता. या गुंतवणुकीवर तुम्हाला ७.६ टक्के चक्रवाढ दराने व्याजाचा लाभ मिळेल. अशाप्रकारे २१ वर्षांनंतर म्हणजेच मॅच्युरिटीवर, ही रक्कम सुमारे १५,२२,२२१ रुपये होईल.
