मान्सूनची प्रगती हा शेती आणि अर्थव्यवस्थेसाठीही शुभसंकेत

बँकांच्या फेरभांडवलीकरण निधीचा आकडा अद्याप अनिश्चित
(स्टॅनफोर्ड) कॅलिफोर्निया: सार्वजनिक क्षेत्रातील बँकांनी अर्थव्यवस्थेच्या प्रगतीत सकारात्मक भूमिका पार पाडली असली, तरी सरकारने अजून त्यांच्या फेरभांडवलीकरणासाठी द्यावयाचा निधीचा आकडा निश्चितपणे ठरवलेला नाही, असे अर्थमंत्री अरूण जेटली यांनी सांगितले. स्टॅनफोर्ड विद्यापीठात आयोजित समारंभात ते बोलत होते. सरकारने बँकांच्या फेरभांडवलीकरणाचा निर्णय तत्त्वत: घेतला आहे. त्याचवेळी सरकारने या बँकातील आपले भागभांडवल ५२ टक्क्य़ांपर्यंत खाली आणण्याचे ठरवले आहे. यातून या बँकांमध्ये खासगी भांडवल येईल. तरीही अर्थसंकल्पीय साधनांतून यावर्षी व पुढच्या वर्षी बँकांमध्ये भांडवल दिले जाईल, अशी त्यांनी ग्वाही दिली. सरकारी बँकांनी पायाभूत उद्योगांना प्रोत्साहनाची पार पाडलेली भूमिका स्वागतार्ह आहे. शिवाय जेथे खासगी बँका कमी पडतात, अशा सामाजिक जबाबदारीचे तत्त्व या बँका पाळतात, अशी प्रशस्तीवजा पुस्तीही त्यांनी जोडली. आपण अर्थमंत्री झाल्यानंतर बँकांमध्ये अधिक व्यावसायिक व्यक्तींना आणण्यासाठी नवीन पद्धत तयार केली आहे. अध्यक्ष व मुख्य कार्यकारी अधिकारी ही पदे वेगळी करण्यात आली आहेत. कार्यकारी संचालक पदही खासगी बँकातून येणाऱ्या व्यक्तींसाठी खुली केली आहेत, पण त्यामुळे बँकांचे सगळे कार्यात्मक प्रश्न सुटणार नाहीत, असेही त्यांनी सांगितले. आशियाई पायाभूत निधी गुंतवणूक बँकेविषयी त्यांनी सांगितले की, चीननंतर या बँकेत भारत हा दुसरा मोठा भागीदार असेल. भारताच्या अधिकृत समावेशासाठी आपण या महिन्यातच बीजिंगला जाणार आहोत.