तेजीच्या भांडवली बाजाराचा लाभ उठवत म्युच्युअल फंडांनी रोखे (डेट) बाजारात नुकत्याच संपलेल्या आर्थिक वर्षांत ९ टक्के अधिक रक्कम गुंतविली आहे. फंड व्यवस्थापकांची रोखे बाजारातील २०१४-१५ मधील गुंतवणूक ६ लाख कोटी रुपयांपर्यंत गेली आहे, तर समभाग बाजारात फंडांची गुंतवणूक सरलेल्या आर्थिक वर्षांत ४०,००० कोटी रुपयांहून अधिक झाली आहे. 
गेल्या आर्थिक वर्षांत सहा वर्षांतील उत्तम कामगिरी करणाऱ्या प्रमुख भांडवली बाजारांच्या निर्देशांकांनी तब्बल २५ टक्क्यांहून अधिक झेप नोंदविली आहे. याच वर्षांत सेन्सेक्सने ३० हजार तर निफ्टीने ९ हजारांपर्यंतचा वरचा टप्पाही गाठला. बाजाराच्या या तेजीत म्युच्युअल फंडांनीही आपला सहभाग नोंदविला आहे. बाजारातील डेट प्रकारात फंडांची गुंतवणूक यंदा प्रथमच ५.८७ लाख कोटी रुपयांवर गेली आहे. आधीच्या वर्षांत ही रक्कम ५.४३ लाख कोटी रुपये होती. देशातील म्युच्युअल फंड उद्योगाने मार्च २०१५ अखेर संपलेल्या आर्थिक वर्षांत १२ लाख कोटी रुपयांच्या निधी व्यवस्थापनाचा टप्पाही पार केला आहे.
गेल्या वर्षीच्या तुलनेत यंदा फंड मालमत्ता ३ लाख कोटी रुपयांनी वाढत विक्रमी टप्प्यावर पोहोचली आहे. वर्षभरात म्युच्युअल फंडांच्या एकूण गंगाजळीतील ३१ टक्के वाढ नोंदविली आहे. तुलनेत विदेशी संस्था गुंतवणूकदारांनी डेट बाजारात १.६४ लाख कोटी रुपये निव्वळ गुंतवणूक केली आहे.
