‘एक लाखाची कार’, असा गाजावाजा करत सादर झालेल्या नॅनोचे नावीन्य संपले असले तरी स्पर्धेत टिकून राहण्यासाठी नॅनोला नवे रूप देण्याचा टाटा मोटर्सचा निर्धार आहे. अ‍ॅटोमॅटिक गीअर शिफ्ट स्वरूपात नॅनो सादर केली जाणार असून खपातील घसरणीमुळे या गाडीचे उत्पादनच बंद करण्याच्या अफवांचा टाटा मोटर्सने स्पष्ट शब्दांत इन्कार केला आहे.
टाटा समूहाचे अध्यक्ष रतन टाटा यांच्या स्वप्नातील ही कार बऱ्याच गाजावाजानंतर २००९ मध्ये भारतीय बाजारपेठेत दाखल झाली. मात्र, त्यानंतर सातत्याने नॅनोचा खपाचा आलेख उतरता राहिला आहे. गेल्या वर्षी जानेवारीमध्ये नॅनो ट्विस्ट या नव्या स्वरूपात सादर झाली. मात्र, तरीही गेल्या वर्षी एप्रिल ते डिसेंबर या कालावधीत फक्त ११ हजार ३३३ नॅनो कारची विक्री झाली. या पाश्र्वभूमीवर नॅनोचे उत्पादनच बंद करण्याचे घाटत असल्याच्या अफवा उठल्या होत्या. मात्र, टाटा मोटर्सने या अफवांचा इन्कार करत नॅनो आणखी आकर्षक स्वरूपात सादर केली जाणार असल्याचे स्पष्ट केले. नव्या रूपातील नॅनोमध्ये आणखी आकर्षक सुविधाही असतील, असेही टाटा मोटर्सतर्फे सांगण्यात आले.
दरवर्षी दोन नव्या गाडय़ा
नुकत्याच सादर झालेल्या झेस्ट व बोल्ट या अनुक्रमे सेडान आणि हॅचबॅक प्रकारांतील गाडय़ांच्या विक्रीवर टाटा मोटर्सने जास्त भर दिला आहे. या गाडय़ांना देशांतर्गत बाजारपेठेत उत्तम प्रतिसाद मिळत असून २०२० पर्यंत दरवर्षी दोन ते तीन नव्या गाडय़ा सादर करण्याचा टाटा मोटर्सकडून सांगण्यात आले.