सेन्सेक्स १९ हजाराखाली; घसरत्या रुपयाने गुंतवणूकदारांत धास्ती

व्यवहाराच्या सुरुवातीलाच विक्रमी तळाला पोहोचलेला रुपया पाहून भांडवली बाजारातील गुंतवणूकदारांनी मंगळवारी उरली सुरली उमेदही सोडून दिली. परिणामी सेन्सेक्स एकाच व्यवहारात ४५० अंशांनी घसरताना १९ हजाराच्याही खाली आला. निफ्टीतही जवळपास दिडशे अंशांची घट होऊन राष्ट्रीय शेअर बाजाराचा निर्देशांक ५,५०० वर येऊन ठेपला आहे. प्रमुख निर्देशांकाची ही २७ जूननंतरची सर्वात खालची पातळी आहे.
भांडवली बाजाराने सलग आठ सत्रात हजार अंशांची घट नोंदविल्यानंतर सोमवारी नव्या सप्ताहाचा प्रारंभ किरकोळ वाढीने केला होता. मंगळवारी मात्र कमकुवत आशियाई बाजारांमुळे सेन्सेक्समध्ये सुरुवातीलाच शतकी घसरण झाली. याचवेळी सकाळच्या व्यवहारात रुपयाने ६१ च्या खाली सरकताना ६१.५१ ला नवा नीचांक गाठल्याचे पाहून गुंतवणूकदारांनी येथेही समभाग विक्रीचा सपाटा सुरू केला. याचवेळी सेन्सेक्समध्ये २०० अंशापर्यंतची घसरण होऊन मुंबई निर्देशांकानेही १९ हजाराचा स्तर सोडला. दुपारपूर्वीच निर्माण झालेल्या या वातावरणात आघाडीचे क्षेत्रीय निर्देशांकही लोळण घेऊ लागले. निर्देशांकातील ही घसरण उत्तरोत्तर वाढतच गेली. दिवसअखेर बाजार ४४९.२२ अंशांने आपटी घेत १९ हजाराच्याच खाली, १८,७३३.०४ पर्यंत गडगडला. एकाच व्यवहारातील त्याची मोठी घसरणही महिन्याभराच्या कालावधीतील ठरली. यापूर्वी ५२६ अशी घट त्याने जूनच्याच २० तारखेला नोंदविली होती.