पावसाबाबत अनिश्चिता : अर्थवृद्धी, महागाई दरावरील टांगती तलवार

चालू हंगामात पाऊस-पाण्याची देशभरातील प्रगती आणि त्याचे शेती क्षेत्राच्या दृष्टीने परिणाम या संबंधाने अद्याप निश्चित काही सांगता येण्याची स्थिती नसून, ही बाब देशाची आगामी आर्थिक वृद्धी आणि महागाई दरासंबंधाने मोठय़ा जोखमीची आहे, असे रिझव्‍‌र्ह बँकेने २०१४-१५ सालच्या आपल्या वार्षिक अहवालात पुन्हा एकदा अधोरेखित केली आहे.
सध्या सुरू असलेल्या पावसाने दुष्काळ-छायेची प्रारंभिक भीती नाहीशी केली असली, तरी तो सर्वत्र पुरेसा व संपूर्ण हंगामभर सुरू राहण्याबाबत आजही अनिश्चितता दाटली आहे, असे नमूद करीत मध्यवर्ती बँकेच्या अहवालाने, तुटीच्या पावसाच्या स्थितीचे विपरीत परिणाम आटोक्यात ठेवण्याच्या उपायांची गरजही व्यक्त केली आहे. अन्नधान्य व्यवस्थापनाची र्सवकष यंत्रणेसाठी आतापासून पुढाकार आवश्यक असल्याचे अहवालाचे म्हणणे आहे. रिझव्‍‌र्ह बँकेने मार्च २०१६ पर्यंत महागाईचा दर हा सहा टक्क्यांखाली राहील असे लक्ष्य राखले आहे. तथापि हे लक्ष्य गाठण्यासाठी तुटीचा पाऊस जोखमीचा ठरेल, असे अहवालाने सूचित केले आहे.