जागतिक अर्थसंकटाची चिंता वाहताना देशातील भांडवली बाजार सप्ताहअखेर जबर घसरणीसह बंद झाला. अमेरिकेतील चिंताजनक बनलेल्या वित्तीय स्थितीमुळे जगभरात सर्वच शेअर बाजार घसरले असताना, ‘सेन्सेक्स’सह ‘निफ्टी’ने सव्वा टक्क्यांची घट नोंदविली. उभय बाजारातील गेल्या दोन महिन्यातील ही सर्वात मोठी घसरण होती.
अमेरिकेतील संभाव्य वित्तीय संकटाचा परिणाम म्हणून गेल्या काही दिवसांपासून नरम असलेला मुबई शेअर बाजाराने दुपारनंतर कमालीचा नकारात्मक कल दाखविला. दिवसातील १.०९% घसरणीमुळे ‘सेन्सेक्स’ १९,२४२ वर स्थिरावला. मुंबई निर्देशांकातील प्रमुख ३० पैकी २८ समभाग घसरले. तर ५० निवडक कंपन्यांचा समावेश असलेला राष्ट्रीय शेअर बाजाराचा निफ्टी निर्देशांकही ६८.७० अंशाने घसरत ५,८४७.७० पर्यंत खाली आला. लक्षणीय म्हणजे तर मिडकॅप आणि स्मॉलकॅप निर्देशांक १.४७% ने खाली आले.
फ्रान्स, जर्मनी, ब्रिटन या युरोपीय क्षेत्रातील भांडवली बाजार ०.६५% घसरणीसह तर चीन, हाँगकाँग, जपान, तैवान, सिंगापूर, दक्षिण कोरिया येथील निर्देशांक ०.९९% पर्यंत घसरले.
भारती ३% घसरला
टूजी घोटाळ्यासंबंधी दाखल झालेल्या आरोपपत्रांचा विपरित परिणाम या क्षेत्रातील कंपन्यांच्या समभाग मूल्यावर शुक्रवारी दिसून आला. ग्राहकसंख्येत देशातील पहिल्या क्रमांकाची भारती एअरटेलच्या समभागही दिवसअखेर ३.०८% नुकसानासह ३०७.१५ वर स्थिरावला. भारती एअरटेलसह व्होडाफोन इंडिया (तत्कालिन हचिसन मॅक्स) व स्टर्लिग सेल्युलर (आताची व्होडाफोन मोबाईल सव्र्हिसेस) विरोधातही तपास यंत्रणेने आरोपपत्र दाखल केले आहे.