चिनी ‘पड’साद ! सेन्सेक्समध्ये ५३८ अंशांची आपटी; तर निफ्टीची ७८०० पर्यंत घसरण

नक्की काय झाले?
प्रमुख निर्देशांक आता त्यांच्या गेल्या तीन महिन्यांच्या तळात येऊन पोहोचले आहेत. गेल्या सलग दोन व्यवहारात तेजी नोंदविणारा मुंबई शेअर बाजार आता २२ सप्टेंबर २०१५ च्या समकक्ष येऊन ठेपला आहे. तर सोमवारची निफ्टीची ही एकाच व्यवहारातील १ सप्टेंबर २०१५ नंतरची सर्वाधिक मोठी घसरण ठरली आहे.
२०१६च्या दुसऱ्या व्यवहारातच अस्वस्थ झालेल्या मुंबई शेअर बाजाराने त्याचा गेल्या वर्षअखेर कमाविलेला १०० लाख कोटी रुपयांचा बाजारमूल्याचा टप्पाही खाली आणला. तर एकाच व्यवहारातील निर्देशांकाच्या तणावपूर्ण कामगिरीमुळे गुंतवणूकदारांना सोमवारी १.५४ लाख कोटी रुपयांचा जोरदार फटका बसला.

आपल्यावर परिणाम काय?
जागतिक घडामोडींचा भारतीय अर्थव्यवस्थेवर मोठा परिणाम होत नाही हे अमेरिकेच्या फेडरल रिझव्‍‌र्ह बँकेच्या व्याजदर वाढीतून स्पष्ट झालेले ताजे उदाहरण असले तरी चिनी पडझडीमुळे शेजारच्या देशाबरोबर, विशेषत: निर्यातीबाबतच्या भारताच्या संबंधांवर विपरित परिणाम होण्याचे संकट कायम आहे. तसेच चीनमधून होणाऱ्या पोलादासारख्या महत्त्वाच्या आयात वस्तू, विद्युत उपकरण बाजारपेठ येत्या काही कालावधीत मागणी आणि पुरवठय़ाबाबत अस्वस्थता नोंदविण्याची शक्यता आहे.

दोन्ही प्रमुख निर्देशांकातील जवळपास २ टक्क्य़ांहून अधिक झालेली सोमवारची घसरण ही प्रामुख्याने चीनच्या मंदावलेल्या अर्थव्यवस्थेमुळे आहे. चिनी अर्थव्यवस्थेशी संबंध येणाऱ्या विशेषत: भारतीय पोलाद उद्योगावर त्यामुळे चिंतेचे मळभ येणे क्रमप्राप्त आहे. अल्प कालावधीसाठी बाजार काहीसे भीतिदायक वातावरण निर्माण करत असले, तरी देशातील भांडवली बाजार दीर्घ कालावधीसाठी अधिक मूल्य कमाविणारे ठरतील.
– जिमीत मोदी, मुख्य कार्यकारी अधिकारी, सॅम्को सिक्युरिटीज.