सेन्सेक्सची दौड पुन्हा २७ हजारापार

सलग पाचव्या व्यवहारात तेजीच्या प्रवासावर राहिलेल्या मुंबई शेअर बाजाराच्या सेन्सेक्सने २७ हजारांचा टप्पा गुरुवारी पुन्हा एकदा गाठला. अमेरिकी फेडरल रिझव्‍‌र्हने तूर्त व्याजदर स्थिर ठेवण्याचा परिणाम म्हणून जवळपास शतकी वाढीने निफ्टीनेही त्याचा ८,१०० पल्याड महत्त्वाचा स्तर ओलांडला.
२८३.१७ अंश वाढीसह सेन्सेक्स २७,११५.८३ वर तर ८३.०५ अंश वाढीसह निफ्टी ८,१७४.६० पर्यंत पोहोचला आहे. दोन्ही प्रमुख निर्देशांकात प्रत्येक एक टक्क्याहून अधिक तेजी नोंदली गेली. सत्रात सेन्सेक्स २७,१७५.३९ पर्यंत झेपावला होता. डॉलरच्या तुलनेत व्यवहारात अधिक भक्कम होत असलेल्या रुपयाचाही सकारात्मक परिणाम प्रमुख निर्देशांकात तेजी नोंदविण्यास भाग पडला. गेल्या सलग पाच व्यवहारांतील सेन्सेक्सची तेजी ७४५ अंश राहिली आहे. परिणामी मुंबई निर्देशांक आता गेल्या पंधरवडय़ाच्या वरच्या टप्प्यावर पोहोचला आहे.
सेन्सेक्समधील ३० पैकी २२ समभाग तेजीच्या यादीत राहिले. रिलायन्स इंडस्ट्रीजची आघाडी गुरुवारीही कायम राहिली. सेन्सेक्सबरोबरच रिलायन्सही सलग पाचव्या सत्रात उसळला आहे. मारुती सुझुकी, डॉ. रेड्डीज, टाटा मोटर्स, सन फार्मा, ओएनजीसी, हिंदाल्को, एचडीएफसी बँक, स्टेट बँक, एचडीएफसी या कंपन्यांनाही मागणी राहिली.
केंद्र सरकारच्या बुधवारच्या निर्णयानंतर शहरी भागातील गरिबांना अधिक स्वस्तात कर्ज उपलब्ध होणार असल्याने बाजारातील गृह वित्त कंपन्यांचे समभाग मूल्य ५ टक्क्यांपर्यंत वाढले. तर क्षेत्रीय निर्देशांकांमध्ये तेल व वायू निर्देशांक सर्वाधिक २.६३ टक्क्यांनी वाढला. पाठोपाठ ग्राहकोपयोगी वस्तू, भांडवली वस्तू, बँक, ऊर्जा, माहिती व तंत्रज्ञान आदी निर्देशांकही चमकले.

गृह वित्त कंपन्यांचा भाव वधारला
मोदी सरकारने ‘सर्वासाठी घरे’ योजनेला दिलेल्या मंजुरीनंतर तसेच शहरी भागातील गरिबांना सवलतीच्या दरात गृह कर्ज उपलब्ध करून दिल्याच्या निर्णयानंतर गृह वित्त पुरवठा करणाऱ्या भांडवली बाजारातील सूचिबद्ध कंपन्यांचे समभागांचे मूल्य कमालीने उंचावले. बुधवारच्या तुलनेत त्यांना ५ टक्क्यांपर्यंत अधिक भाव मिळाला.

*जीआयसी हाऊसिंग फायनान्स    : रु. २१९.६५ +४.४०%
*एलआयसी हाऊसिंग फायनान्स   : रु. ४३०.९५ +३.६९%
*दिवाण हाऊसिंग फायनान्स      : रु. ४२६.०० +२.९६%
*इंडियाबुल्स हाऊसिंग फायनान्स   : रु. ५९७.९५ +२.८१%

‘रिलायन्स’ला बाजारतेजीचे नेतेपद
भांडवली बाजाराबरोबरच प्रमुख निर्देशांकांमध्ये दमदार स्थान असणारा व प्रचंड मोठे बाजारमूल्य असलेल्या रिलायन्स इंडस्ट्रिजचा समभागही गेल्या काही सत्रांपासून सलग उंचावत आहे. सलग पाचव्या व्यवहारात मूल्य वाढताना रिलायन्स ५.४६ टक्क्यांनी वाढला. त्याला दिवसअखेर ९८१.४५ रुपयांचा भाव मिळाला. रिलायन्सच्या या आठवडय़ात मंगळवारी झालेल्या ४१व्या वार्षिक सर्वसाधारण सभेदरम्यान भागधारकांनी कंपनीच्या ढासळत्या समभाग मूल्याबाबत प्रवर्तक मुकेश अंबानी यांच्या उपस्थितीत नाराजी व्यक्त केली होती. मात्र सभेनंतर आतापर्यंत पाच दिवसांत हा समभाग तब्बल १२ टक्क्यांनी वाढला आहे. गेल्या काही वर्षांत हजाराची पातळीही दुरापास्त बनलेला रिलायन्सने सध्या बाजारतेजीचे नेतृत्व स्वीकारलेले दिसते.