महागाई शून्यात!

महागाई निगडित किरकोळ पाठोपाठ घाऊक किंमत निर्देशांकही नरमल्याने रिझव्‍‌र्ह बँकेकडून व्याजदर कपातीच्या अपेक्षांना पुन्हा एकदा बळ मिळाले आहे. मात्र अमेरिकी चलनाच्या पुढय़ात रुपया ६३ पर्यंत नांगी टाकत असल्याने स्वस्त कर्जाची गव्हर्नर डॉ. राजन यांची भेट नवे वर्ष सुरु झाल्यानंतरच मिळण्याची चिन्हे आहेत.
नोव्हेंबरमधील महागाई दर शून्य टक्क्य़ांवर विसावताना गेल्या पाच वर्षांच्या नीचांकावर येऊन ठेपला आहे. गेल्याच आठवडय़ात जाहिर झालेल्या किरकोळ महागाई दरानंतर आता घाऊक महागाई दरही किमान स्तरावर आला आहे. घाऊक किंमत निर्देशांक ऑक्टोबरमध्ये १.७७ टक्के तर वर्षभरापूर्वी ७.५२ टक्के होता. जुलै २००९ नंतर प्रथमच महागाई दर शून्याखाली आला आहे. यापूर्वी तो उणे ०.३ टक्के होता.
भाज्या, कांदे, खाद्यतेल, पेट्रोल व डिझेल यांच्या किंमती कमी झाल्याने महागाई दराला यंदा ही दिलासाजनक कामगिरी बजाविता आली आहे. सलग सहाव्या महिन्यात दर नरमला आहे. तर अन्नधान्याचा महागाई दर ०.६३ टक्क्य़ांवर आला आहे. यंदाच्या मेपासून तो सतत घसरत आता गेल्या तीन वर्षांच्या तळात आला आहे. इंधन व ऊर्जा महागाई दरदेखील ४.९१ टक्क्य़ांनी कमी होऊन २००९ च्या समकक्ष आला आहे.

व्यापार तूट विस्तारली;सोने आयात सहापट
देशातील व्यापार तूट दीड वर्षांच्या उच्चांकावर पोहोचली असून वाढत्या सोने आयातीमुळे नोव्हेंबरमधील व्यापार तूट १६.८६ अब्ज डॉलर नोंदली गेली आहे. भारताने गेल्या महिन्यात ७.२७ टक्के निर्यात राखूनही मौल्यवान धातूतील आयात मात्र सहा पट झाली आहे. आहे.
सणांचा मोसम संपत असण्याच्या महिन्यातही सोन्यातील आयात चिंताजनक मानली जात आहे.
नोव्हेंबर २०१३ मध्ये व्यापार तूट ९.५७ अब्ज डॉलर होती. तर यंदा सोने आयात ५.६१ अब्ज डॉलर झाली आहे. वर्षभरापूर्वी ती ८३.५८ कोटी डॉलर होती. गेल्या महिन्यात एकूण आयात २६.७९ टक्क्य़ांनी वधारत ४२.८२ अब्ज डॉलर झाली आहे. यात तेल आयात ९.७ टक्क्य़ांनी घसरली आहे.