Sensex Today : सेन्सेक्सची विक्रमी घोडदौड सुरू, निफ्टीनंही केला १८ हजारांचा टप्पा पार!

करोनाच्या रुग्णांचं प्रमाण नियंत्रणात येऊ लागलेलं असताना हळूहळू बाजारात तेजी दिसू लागली आहे. आज सकाळी मुंबई शेअर बाजार उघडला, तेव्हा सेन्सेक्सनं नवा उच्चांक गाठत ६० हजारांच्या पुढे मजल मारली. सेन्सेक्सनं सकाळीच ६०.६२१ अशी विक्रमी उसळी घेत बाजारात सकारात्मक वातावरण तयार केलं. आयसीआयसीआय बँक, एचडीएफसी बँक आणि एम अँड एमच्या शेअर्सनं केलेली जोमदार कामगिरी सेन्सेकच्या उसळीला कारणीभूत ठरल्याचं दिसून आलं. यापैकी एम अँड एमनं सर्वाधिक ३ टक्क्यांची उसळी घेतली. त्यापाठोपाठ पॉवर ग्रीड, भारती एअरटेल, एल अँड टी, आयसीआयसीआय बँक आणि अॅक्सिस बँक यांनी देखील जोरदार कामगिरी केली.