2025 Astrology Predictions for Number 1 : अंकशास्त्रात प्रत्येक अंकाचे महत्त्व सांगण्यात आले आहे. जन्मतारखेनुसार मूलांक आणि भाग्यांक काढला जातो. मूलांकाच्या आधारे तुमचा दिवस कसा असेल हेसुद्धा तुम्ही अगदी सहज जाणून घेऊ शकता. तुमच्या जन्मतारखेची गणना करून तुमचा मूलांक कोणता आहे हे तुम्हाला समजू शकते. मूलांक जाणून घेण्यासाठी तुम्हाला फक्त तुमच्या जन्मतारखेची बेरीज करायची आहे. उदाहरणार्थ, जर तुमची जन्मतारीख १० असेल तर तुमचा मूलांक १+०=१ म्हणजे १ आहे. तर येणारे २०२५ हे वर्ष ‘मूलांक १’ साठी कसे जाणार? त्यांच्या व्यवसाय, आर्थिक, करिअर, नोकरी, कौटुंबिक आणि वैवाहिक जीवनात काय बदल होणार हे आपण थोडक्यात जाणून घेण्याचा प्रयत्न करूया…
तर ज्यांची जन्मतारीख १,१०,१९ व २८ आहे, अशा व्यक्तींचा मूलांक १ असतो. तर २०२५ या वर्षाचा मूलांक जर तुम्ही काढला तर त्याची बेरीज ९ येते. ९ या संख्येवर मंगळ ग्रहाचा अंमल असतो, त्यामुळे ९ बरोबर १ मूलांकाचा प्रवास अधिक मंगलमय होईल. तुमच्यातील आत्मविश्वास हाच तुमचा खरा मार्गदर्शक ठरेल. फक्त राग, क्रोध, साहस, शौर्य याचा उपयोग मोजून आणि मापून करावा लागेल. थोडक्यात काय, तर अतिरेक टाळावा लागेल.
खरेदी-विक्री व्यवहारात फायदा
विशेषतः प्रेम प्रकरणात सावध राहावे लागणार आहे. वचन अथवा शब्द देऊन स्वतःची कोंडी होणार नाही, ही दक्षता घेणे खूपच गरजेचे ठरेल. या वर्षात खूप जास्त रखडलेल्या गोष्टींना चालनासुद्धा मिळेल. जमीन, शेती, खरेदी-विक्री व्यवहारात नक्की फायदा होईल. मात्र, कागदपत्रे नीट तपासून घेऊन, कायद्याची चौकट सांभाळणेसुद्धा तितकेच गरजेचे ठरणार आहे.
नोकरी-धंद्यात बदल करण्याची संधीसुद्धा तुम्हाला लाभेल. पण, यादरम्यान घाईगडबडीने निर्णय घेणे टाळा. एकंदरीत वर्षभरात मे महिन्यानंतरचे पुढील सहा महिने आर्थिक व मानसिकदृष्ट्या चांगले जातील. खेळ, क्रीडा क्षेत्रात उत्तम यश लाभेल. राजकारणात, सामाजिक क्षेत्रात आपण घेतलेल्या लहान-मोठ्या निर्णयाचे मनापासून स्वागत होईल. १,४,५ व ७ या मूलांकाच्या व्यक्ती मैत्रीचा हात पुढे करतील. अशावेळी त्याचे हस्तांदोलन स्वीकारा, ते तुमचा सन्मान करतील, त्यातून नवी सुरुवात होईल व जीवनाची योग्य दिशा ठरेल. तर आज आपण या लेखातून मूलांक १ चे २०२५ हे वर्ष कसे जाईल याचा अभ्यास केला; तर पुढील लेखात आपण ‘मूलांक २’ चे २०२५ हे वर्ष कसे जाईल हे पाहणार आहोत.
© IE Online Media Services (P) Ltd