रामलल्लाच्या प्राणप्रतिष्ठा मुहूर्तातील ‘ही’ ८४ सेकंद आहेत सर्वात खास; जाणून घ्या शुभ मुहूर्ताची वेळ

राम मंदिर प्राणप्रतिष्ठा दिवस आणि मुहूर्त (Ayodhya Ram Mandir Ramlala Pran Pratishtha Ceremony Full Schedule)

२२ जानेवारी २०२४ रोजी दुपारी १२.२९ वाजून ८ सेकंद ते १२.३० वाजून ३२ सेकंद असा मुहूर्त राम लल्लाच्या प्राणप्रतिष्ठेसाठी काढण्यात आला आहे. यात श्रीरामाची प्राणप्रतिष्ठा करण्यासाठी केवळ ८४ सेकंदांचा शुभ मुहूर्त ठरवण्यात आला आहे.

२२ जानेवारी २०२४ ही तारीख इतकी शुभ का?

शुभ मृगाशिरा नक्षत्र सोमवारी (२२ जानेवारी) पहाटे ३ वाजून ५२ मिनिटांनी सुरू होईल, तर २३ जानेवारीला (मंगळवार) पहाटे ४ वाजून ५८ मिनिटांपर्यंत कायम राहील. २२ जानेवारीला अभिजात मुहूर्त सकाळी ११:५१ ते दुपारी १२:३३ पर्यंत आहे.

प्राणप्रतिष्ठा म्हणजे काय?

हिंदू धर्मात प्राणप्रतिष्ठेला विशेष महत्त्व आहे. पण, प्राणप्रतिष्ठा म्हणजे नेमकं काय समजून घेऊ. प्राणप्रतिष्ठा म्हणजे कोणत्याही देवतेच्या मूर्तीची स्थापना करण्यापूर्वी त्यात जीव प्रस्थापित केला जातो. प्राणप्रतिष्ठा म्हणजे मूर्तीत प्राणशक्ती प्रस्थापित करणे. त्यामुळे मूर्तीवर अभिषेक केल्यानंतर मूर्तीचे देवतेत रूपांतर होते. वेद आणि पुराणातील विधींप्रमाणे प्राणप्रतिष्ठा केली जाते. पण, कोणत्याही मूर्तीच्या अभिषेकाचे वेगवेगळे टप्पे असतात. ज्यामध्ये अधिवास, जलाधिवास, अन्नाधिवास, फलाधिवास, धृतअधिवास यांसारख्या अधिवासांचा समावेश आहे.

Rahu Gochar : राहू गोचरमुळे ‘या’ तीन राशींच्या लोकांच्या आयुष्यात निर्माण होईल अशांतता? होऊ शकते आर्थिक नुकसान

२१ आणि २२ जानेवारीला राम मंदिरात होणार ‘हे’ कार्यक्रम

२१ जानेवारी २०२४ : या दिवशी यज्ञविधीमध्ये विशेष पूजा आणि हवन केले जाईल, यादरम्यान रामलल्लाला १२५ कलशांसह दिव्य स्नान घातले जाईल. याचबरोबर सकाळी मध्याधीवास आणि सायंकाळी शय्याविधी असतील.

२२ जानेवारी २०२४ : मधल्या काळात मृगाशिरा नक्षत्रात रामलल्लाच्या मूर्तीवर गर्भगृहात अभिषेक करण्यात येईल आणि विधीनुसार पूजा केली जाईल.

(टीप : वरील लेख हा प्राप्त माहितीवर आधारित आहे)