2025 Astrology Predictions for Number 7 : अंकशास्त्रात व्यक्तीच्या मूलांकावरून भविष्यात होणाऱ्या किंवा पुढे घडणाऱ्या घटनांविषयी अंदाज लावता येतो. तर यासाठी जन्मतारखेवरून व्यक्तीचा मूलांक शोधला जातो. मूलांक संख्या ही १ ते ९ पर्यंत असते. मूलांक शोधण्यासाठी त्या व्यक्तीच्या जन्मतारखेची बेरीज केली जाते. जर तुमच्या जन्मतारखेचा एकांक ७ येत असेल, तर तुम्हाला हे वर्ष कसे जाईल? तुमच्या स्वभावात, करिअरमध्ये काही बदल होणार का? कोणत्या क्षेत्रात तुम्हाला लाभ मिळेल याबद्दल आपण आज या लेखातून जाणून घेऊ…
ज्यांची जन्मतारीख ७, १६ व २५ यापैकी आहे, त्यांचा मूलांक ७ असतो. अशा लोकांची मानसिकता स्थिर, अति कोमल, भावनाशील असते; पण चेहरा मात्र खूप गंभीर असतो. मूलांक ७ असणाऱ्या व्यक्तींना पुढे घडणाऱ्या घटनांची अस्पष्टपणे जाणीव होत असते. वृत्तीने नाही; पण मनाने ही माणसे आध्यात्मिक असतात. स्वभाव शांत, अतिशय कृतिशील, अल्प व्यवहारज्ञान यामुळे ७ मूलांक असणाऱ्या व्यक्तींवर फसण्याचे प्रसंग वरचेवर येत असतात. जलप्रवासाची खूप आवड, आयुष्यात आश्चर्यकारक बदल, गूढ शक्तीचे आकर्षण, उत्तम प्रतिभा, निर्मळ बोलणे, नि:स्वार्थी वृत्ती, अशी ७ मूलांक असणाऱ्या व्यक्तींची ओळख सांगितली जाते.
२०२५ या वर्षाच्या संख्येची बेरीज २ + ० + २ + ५ = ९ (नऊ) आहे. ९ हा अंक मंगळाचा आहे. त्यामुळे ७ मूलांक असणाऱ्या व्यक्तींच्या जीवनात मंगळाचे अस्तित्व समाविष्ट असेल. त्यामुळे संशोधन कामात यांना एक विशेष मदत लाभेल. कामाचा वेग वाढेल. त्यामुळे उर्वरित वेळ ते दुसऱ्या कामासाठी देऊ शकतात. हळव्या स्वभावात थोडा तिखटपणा, बेरडपणा येईल. त्यामुळे यांच्या स्वभावाचा फायदा घेणाऱ्यांची संख्या कमी होईल आणि मानसिक स्थैर्य लाभेल.
औषधे, फॅशन, सिनेमा, नाट्य क्षेत्रात यांचे नवीन प्रयोग यशस्वी होतील. त्यातून आर्थिक लाभही होईल. नव्या ओळखी, नवीन परिचय, नवीन कामे हाती येतील. त्यामुळे ७ मूलांक असणाऱ्या व्यक्तींना हे वर्ष सुख-समाधानाचे जाईल. पांढरा रंग तुमच्यासाठी सुखदायक ठरेल. त्याचप्रमाणे मे व ऑक्टोबर हे दोन महिने तुमच्यासाठी शुभदायक ठरणार आहेत. तर, अशा प्रकारे ७ मूलांक असणाऱ्यांचे वर्ष सरेल. यापुढील लेखातून आपण मूलांक ८ असणाऱ्यांचे २०२५ हे वर्ष कसे जाईल याबद्दल जाणून घेणार आहोत.
