मेष : यशस्वी नियोजन

दिनांक २९ रोजीचा एकच दिवस सोडला तर बाकी दिवसांचा कालावधी उत्तम असेल. अमावास्या भाग्यस्थानातून होत आहे. कोणतेही काम करण्यासाठी त्रास होणार नाही. सध्या दिवस चांगले असल्यामुळे अडथळा जाणवणार नाही. आपले काम करून इतरांनाही मदत करण्याची भावना निर्माण होईल. ज्या ज्या गोष्टींचे तुम्ही या सप्ताहात नियोजन आखलेले आहे, ते यशस्वी होईल. व्यवसायातील परिस्थिती उत्तम राहील. नोकरदार वर्गाला वरिष्ठांना दिलेला शब्द पाळावाच लागेल. आर्थिकदृष्ट्या स्वावलंबी बनाल. राजकीय क्षेत्रात महत्त्वाच्या गोष्टीवर चर्चा होईल. मित्र परिवारासाठी वेळ काढाल. संतती सौख्य लाभेल. घरगुती वातावरण चांगले राहील. धार्मिक गोष्टींसाठी खर्च कराल. मानसिक समाधान लाभेल. आरोग्य उत्तम राहील.

शुभ दिनांक : ३, ४

महिलांसाठी : आवडीच्या क्षेत्रात कार्य कराल.

वृषभ : कष्टाचे फळ मिळेल

दिनांक ३० व ३१ हे दोन दिवस चांगले कसे जातील ते पाहा. कारण या दिवसांत तुम्ही जरी चांगले वागायचे ठरवले, कोणाला काही बोलायचे नाही; तरी तसे होणार नाही. कारण या दिवसांत समोरून येणारा प्रस्ताव हा वाद निर्माण करणारा असेल. अशावेळी एक गोष्ट लक्षात ठेवा की, सध्याची वेळ आपली नाही. समोरच्याला बोलू द्यायचे आणि आपण शांत राहायचे म्हणजे हे दिवस चांगले जातील. जेव्हा योग्य वेळ येईल तेव्हा तुमच्या मनातले विचार बोलून दाखवा. अमावास्या कालावधीत शांतता राखा. बाकी दिवसांचा कालावधी चांगला राहील. व्यवसायात उलाढाल वाढेल. कष्टाचे फळ मिळेल. नोकरदार वर्गाचे कामकाज व्यस्त राहील. अनपेक्षित लाभ होईल. नातेवाईकांशी संवाद साधाल. जोडीदाराची साथ मिळेल. अध्यात्माची गोडी वाढेल.

आहाराचे पथ्यपाणी सांभाळा.

शुभ दिनांक : १, २

महिलांसाठी : लोकांच्या वागण्या-बोलण्याकडे लक्ष देऊ नका.

मिथुन : तडजोड हिताची राहील

षष्ठ स्थानातून अष्टमस्थानाकडे चंद्राचे भ्रमण होत आहे. ज्यावेळी असे भ्रमण असते त्यावेळी मात्र सतर्कता बाळगावी लागते. विचार न करता कुठलीही गोष्ट करून चालत नाही. म्हणजेच, पुढे बघू काय होईल, अशा भ्रमात राहिलात तर तुमचा हिरमोड झाल्याशिवाय राहणार नाही. म्हणजे नुकसान होण्याची दाट शक्यता राहील; तेव्हा प्रत्येक गोष्टीत तडजोड हिताची राहील हे लक्षात ठेवा. इतरांनी काय करावे काय करू नये याचा सध्या तरी विचार करू नका. आपण काय बदल करायचा त्यामुळे नुकसान होणार नाही याचा विचार करा. अमावास्या कालावधी ठीक राहील. व्यवसायत जे चालले आहे ते ठीक समजून पुढे चला. नोकरदार वर्गाला कामात लक्ष घालावे लागेल. आर्थिक बचत करणे योग्य राहील. कुटुंबाची काळजी घ्या. आध्यात्मिक गोष्टीत गुंतून राहा. स्वत:चे आरोग्य जपा.

शुभ दिनांक : ३, ४

महिलांसाठी : संवाद जपून करा.

कर्क : घाई करू नका

शुभ ग्रहाची साथ कमी आहे असे म्हणायला हरकत नाही. दिनांक ३०, ३१ डिसेंबर व ३, ४ जानेवारी अशा या चार दिवसांत जपून पाऊल टाकावे लागेल. स्वत:च्या कामाव्यतिरिक्त इतर गोष्टीत लक्ष देऊ नका. समोरून आलेला प्रस्ताव चांगला असेल असे नाही. भावनिक गोष्टींच्या आहारी जाणे म्हणजे नुकसान करून घेण्यासारखे आहे. तेव्हा कोणतेही प्रस्ताव स्वीकारताना घाई करू नका. बोलण्याच्या ओघात घेतलेली जबाबदारी त्रासाची राहील. अमावास्या कालावधीत कोणतेही गैरव्यवहार करू नका. व्यवसायात मोठी झेप सध्या घेऊ नका. नोकरदार वर्गाने कामाव्यतिरिक्त इतर गोष्टीत लक्ष घालू नका. आर्थिक बाबतीत सतर्कता बाळगा. राजकीय क्षेत्रात कामात लक्ष लागणार नाही. जोडीदाराच्या सल्ल्याने पुढे जा, म्हणजे नुकसान होणार नाही. प्रकृतीची काळजी घ्या.

शुभ दिनांक : १, २

महिलांसाठी : जबाबदारीने काम करावे लागेल.

सिंह : गुंतवणूक टाळा

दिनांक १, २ हे संपूर्ण दोन दिवस व ३ तारखेला दुपारपर्यंत अशा या कालावधीत सहनशीलता वाढवावी लागेल. कारण नसताना वादविवाद होऊ शकतो; तेव्हा शांत राहून काम करा, म्हणजे नुकसान होणार नाही. कोणाच्या वागण्या बोलण्याकडे लक्ष देऊ नका. आपले काम भले नि आपण भले हे सूत्र लक्षात ठेवा. इतरांना सल्ला देणे टाळा. स्वत:च्या कामाव्यतिरिक्त अन्य गोष्टींत लक्ष घालू नका. तेव्हा डोक्यावर बर्फ तोंडात खडीसाखर हे सूत्र लक्षात ठेवा, बाकी दिवस चांगले असतील. अमावास्या कालावधी चांगला असेल. व्यवसायातून मिळणारे उत्पन्न चांगले असेल. मात्र मोठी गुंतवणूक टाळा. नोकरदार वर्गाला वरिष्ठांचे प्रोत्साहन मिळेल. राजकीय क्षेत्रात शुभेच्छा मिळतील. मित्र परिवाराला मदत कराल. कौटुंबिक जीवन सुखाचे राहील. जोडीदार आनंदी असेल. योगसाधनेला महत्त्व द्या.

शुभ दिनांक : २९, ४

महिलांसाठी : कामात व्यस्त राहिलेले चांगले.

कन्या : कामाचे नियोजन करा

दिनांक ३ आणि ४ असे दोन दिवस अनुकूल नाहीत. या दोन दिवसांत विनाकारण भटकंती करणे टाळा. बऱ्याच दिवसांपासून तोंडावर जो ताबा ठेवलेला आहे तो या दिवसांत सुटणार आहे; तेव्हा प्रत्येक गोष्टीत संयम ठेवा. मित्रांच्या कोणत्याही वैयक्तिक गोष्टींत हस्तक्षेप करू नका. आपल्या कामाव्यतिरिक्त अन्य गोष्टींना महत्त्व देऊ नका. कामाचे नियोजन काटेकोरपणे करा, म्हणजे तुम्हाला त्रास होणार नाही. बेकायदेशीर गोष्टींपासून लांब राहा. अमावास्या कालावधी ठीक राहील. बाकी दिवसांचा कालावधीही चांगला असेल. व्यवसायातून मनासारखे उत्पन्न मिळेल. नोकरदार वर्गाला वरिष्ठांचे मार्गदर्शन मिळेल. आर्थिक व्यवहार चोख ठेवा. समाजसेवा करण्याचे पुण्य पदरी पडेल. घरगुती वातावरण चांगले राहील. विवाह इच्छुकांचे विवाह ठरतील. धार्मिक कार्य पार पाडाल. आरोग्य चांगले राहील.

शुभ दिनांक : १, २

महिलांसाठी : कामात गुंतून राहाल.

तूळ : मनोकामना पूर्ण होतील

सप्ताहात असा कोणताच दिवस नाही की त्या दिवशी संघर्ष आहे. कामात अडचणी आहेत. त्यामुळे तुम्हाला कोणतेही काम करताना आळस वाटणार नाही. काही वेळा गोष्टी कितीही नियंत्रणात ठेवायच्या ठरवले तरी तसे होत नव्हते. परिस्थितीनुसार निर्णय घेणे चांगले जमेल. एका दगडात दोन पक्षी मारण्याचा डाव साध्य होणार आहे. सध्या अशी स्थिती निर्माण होणार आहे की तुमच्या सर्व मनोकामना पूर्ण होतील. अमावास्या कालावधी धडाडीचा राहील. सर्व दिवस चांगले असतील. व्यवसायात फायद्याचे प्रमाण चांगले राहील. नोकरदार वर्गाला मोठी जबाबदारी घ्यावी लागेल. आर्थिक लाभ होईल. राजकीय क्षेत्रातील घडामोडींचा आढावा घ्याल. नातेवाईकांच्या सुखदु:खात सहभागी व्हाल. भावंडांना मदत कराल. धार्मिक कार्यासाठी खर्च कराल. मानसिक समाधान लाभेल आरोग्य उत्तम राहील.

शुभ दिनांक : ३, ४

महिलांसाठी : कामातील अनुभव चांगला असेल.

वृश्चिक : आघाडी मिळवाल

शुभ ग्रहांची साथ व सर्व दिवसांचा कालावधी चांगला असे मिळून येणारे ग्रहमान अतिशय उत्तम आहे. या चांगल्या कालावधीमध्ये महत्त्वाचे करार होतील. इतरांनी दिलेला सल्ला मोलाचा ठरेल. आजपर्यंत काही चढ-उतार लक्षात आले, पण त्यावर पर्याय शोधता आला नाही. सध्या मात्र पर्याय शोधाल आणि त्यात यश मिळेल. स्वत:चे काम स्वत: करायचे अशी एक जिद्द तुमच्या मनामध्ये निर्माण होईल आणि ती तुम्ही पूर्ण करून दाखवाल. प्रत्येक गोष्टीत आघाडी मिळवाल. अमावास्या कालावधीत कौटुंबिक वादविवाद टाळा. व्यवसायातील आवक वाढेल. नोकरदार वर्गाला नवीन कामाची सुरुवात करावी लागेल. आर्थिक परिस्थिती चांगली असेल. राजकीय क्षेत्रात कामाव्यतिरिक्त इतर गोष्टीत लक्ष घालावे लागेल. संतती सौख्य लाभेल. घरातील ज्येष्ठ व्यक्तींचे मार्गदर्शन घ्या.

आरोग्याच्या तक्रारी दूर होतील.

शुभ दिनांक : ३१, १

महिलांसाठी : स्वत:साठी वेळ देणे सहज शक्य होईल.

धनू : अनावश्यक खर्च टाळा

दिनांक २९ रोजीचा एकच दिवस शुभ नाही. या दिवशी महत्त्वाचे निर्णय घेऊ नका किंवा कोणत्याच गोष्टीवर चर्चा करू नका. बाकी दिवसांचा कालावधी चांगला असेल. अमावास्याही चांगली असेल. ज्यावेळी कालावधी चांगला असतो अशावेळी इतरांच्या कामांना महत्त्व द्यायचे, स्वत:ची कामे बाजूला ठेवायची अशी तुमची मनोवृत्ती होते; आणि दिवस शुभ नसतात त्या दिवशी तुम्ही तुमच्या कामांना शुभारंभ करता. तेव्हा तुमची जी कामे बाकी आहेत त्या कामांना प्राधान्य द्या. कामे लवकरात लवकर पूर्ण करून घ्या. त्या कामांना यश मिळेल. व्यवसायात चांगला फायदा होईल. नोकरदार वर्गाला कामात व्यस्त राहावे लागेल. अनावश्यक खर्च टाळा. कुटुंबाचा पाठिंबा राहील. जोडीदाराची मदत मिळेल. आध्यात्मिक गोष्टीत गुंतून राहा.

आरोग्य उत्तम राहील.

शुभ दिनांक : ३१, २

महिलांसाठी : हिशेबाची नोंद ठेवा.

मकर : संयम ठेवा

दिनांक ३०, ३१ हे दोन दिवस इतरांनी काय करावे काय करू नये याचा विचार करू नका आणि त्यांना शिकवायला जाऊ नका. अशाने कारण नसताना गोष्टी अंगलट येऊ शकतात. तुमच्या मनाविरुद्ध एखादी घटना घडली तर त्याचा त्रास स्वत:ला करून घ्यायचा आणि सगळे वातावरणच बिघडून टाकायचे अशी स्थिती निर्माण होते. त्यामुळे कोणाच्या नादी न लागलेले चांगले. न पटणाऱ्या गोष्टींकडे दुर्लक्ष करा आणि कोणालाही फुकटचा सल्ला देत बसू नका. अमावास्या कालावधीत शांतता पाळा. प्रत्येक गोष्टीत संयम ठेवा. बाकी दिवस चांगले असतील. व्यवसायातून जास्त उत्पन्न मिळावे म्हणून नको ते धाडस करू नका. नोकरदार वर्गाचा कामातील उत्साह वाढेल. अनावश्यक खर्च टाळा. राजकीय क्षेत्रातील घडामोडींना वेग येईल. घरगुती वातावरण ठीक राहील. मानसिक व शारीरिक समतोलता राखा. योगसाधनेला महत्त्व द्या.

शुभ दिनांक : १, २

महिलांसाठी : स्पष्ट बोलणे टाळा.

कुंभ : समतोल साधा

दिनांक १, २ या संपूर्ण दोन दिवसांत विचार करून निर्णय घ्यावे लागतील. कारण काही वेळेला परिस्थिती अशी निर्माण होते की निर्णय घ्यावेच लागतात. मात्र निर्णय घेताना समतोल साधायला शिका. एक घाव दोन तुकडे करून चालणार नाही. काही गोष्टी या संथ गतीने होणार आहेत. धरसोडपणा टाळा, त्यामुळे तुमची चिडचिड होऊ शकते. पण या दोन दिवसांत शांतता राखा. अमावास्या कालावधी चांगला असेल. बाकी दिवस चांगले असतील. चांगल्या दिवसांमध्ये बरेच काही बदल होतात याचा अनुभव तुम्हाला येईल. व्यवसायात गुंतवणूक करा. नोकरदार वर्गाचे कामकाज चांगले राहील. आर्थिक बचत करणे योग्य राहील. राजकीय क्षेत्रात स्थिरस्थावर व्हाल. घरगुती वातावरण चांगले राहील. आरोग्याकडे मात्र दुर्लक्ष करू नका.

शुभ दिनांक : ३०, ३१

महिलांसाठी : जुन्या आठवणींना उजाळा मिळेल.

मीन : दुहेरी लाभ होईल

३ तारखेला दुपारनंतर व ४ तारखेचा संपूर्ण एक दिवस असा दीड दिवसांचा कालावधी फारसा शुभ नाही. या कालावधीत जपून संवाद करा. काही गोष्टी अशा असतात की तुमच्या मनामध्ये कोणताही किंतु-परंतु नसतो. मात्र ते बोलून दाखवले जाते; आणि समोरच्याला त्याचे वाईट वाटते व त्यातून गैरसमज निर्माण होतात. तेव्हा या दिवसांत संभाषण कमी केलेले चांगले. आपले मुद्दे कोणाला पटवून देत बसू नका. अमावास्या कालावधीत ज्येष्ठ व्यक्तींच्या प्रकृतीची काळजी घ्या. बाकी दिवस चांगले असतील. व्यवसायात प्रगती होईल. नोकरदार वर्गाला चांगल्या कामासंदर्भात प्रेरणा मिळेल. आर्थिकदृष्ट्या दुहेरी लाभ होईल. राजकीय क्षेत्रात भेटीगाठीचा आनंद मिळेल. मित्रांशी मनमोकळेपणाने गप्पा माराल. संतती सौख्य लाभेल. कुटुंबातील जबाबदारीत अडकाल. धार्मिक गोष्टींसाठी वेळ द्याल.

आरोग्य उत्तम राहील

शुभ दिनांक : १, २

महिलांसाठी : मिळालेल्या संधीचा उपयोग क रा.

gsmita332@gmail.com