बीड जिल्ह्यातील २५ तरुण ‘अच्छे दिन’च्या दिशेने

विशेष म्हणजे कोळपिंपरी गावातील काही तरुण हे ऊस तोडण्यासाठी कर्नाटक किंवा पश्चिम महाराष्ट्रात जात होते. महेंद्र साळवे आणि राहुल वाघमारे या तरुणांनी हजारो रुपयांची उचल घेतली होती. ही रक्कम परत करण्याची जबाबदारी स्वीकारुन मानव विकास प्रतिष्ठानच्या वतीने त्यांना टाटा पॉवर कौशल्य विकास संस्थेत व्यावसायिक प्रशिक्षण दिले जात आहे. याच गावातील दारू विक्रीचा व्यवसाय करणारा तरुण देखील या प्रशिक्षणात सहभागी झाला आहे. मुंबई येथे त्यांना इलेक्ट्रॉनिक या विभागातील वायरमन कोर्सचे प्रशिक्षण दिले जात आहे. प्रशिक्षणार्थींना दोन वेळचे जेवण, एक वेळचा नाश्ता आणि चहा मोफत पुरवण्यात येतोय.

२५ तरुणांपैकी कोळपिंपरी येथील १६ तरुण उपक्रमात सहभागी झाले आहेत. यात शेतकरी, शेतमजूर आणि अनुसूचित जातीमधील सुशिक्षित बेरोजगार तरुणांचा समावेश आहे. प्रशिक्षण झाल्यानंतर मानव विकास प्रतिष्ठान या तरुणांसाठी नोकरीची संधी उपलब्ध करुन देणार आहे. ‘वॉटर कप स्पर्धेत घवघवीत यश मिळाल्यानंतर मुख्यमंत्री दूत आसाराम हातागळे आणि कोळपिंपरी गावच्या सरपंच उषा विजयकुमार खुळे यांनी मुख्यमंत्री ग्राम सामाजिक परिवर्तन अभियानातून आदर्श गावाकडे वाटचाल सुरू केली आहे.