विद्यापीठाचा २२ रोजी ६५ वा दीक्षांत समारंभ; उपराष्ट्रपती, राज्यपालांची उपस्थिती

या समारंभाबाबत घेतलेल्या पत्रकार परिषदेत बोलताना डॉ. विजय फुलारी म्हणाले, दीक्षांत सोहळा येत्या २२ फेब्रुवारी दुपारी ३:२० वाजता विद्यापीठ नाट्यगृहात होणार आहे. कार्यक्रमास राज्याचे उच्च व तंत्रशिक्षण मंत्री चंद्रकांत पाटील व माजी केंद्रीय अर्थ राज्यमंत्री तथा राज्यसभा सदस्य डॉ. भागवत कराड यांना प्रमुख पाहुणे म्हणून निमंत्रित करण्यात आले आहे. यावेळी प्र-कुलगुरु डॉ. वाल्मीक सरवदे, कुलसचिव डॉ. प्रशांत अमृतकर, डॉ.भारती गवळी यांच्यासह चार विद्याशाखेचे अधिष्ठाता, तसेच व्यवस्थापन परिषदेचे सर्व सदस्य यांची प्रमुख उपस्थिती राहणार आहे. सोहळयासाठी एकूण ३० समित्यांची स्थापना करण्यात आली असून जवळपास दीडशे सदस्य कार्यक्रमाच्या यशस्वीतेसाठी प्रयत्नशील आहेत.

५६ हजार १२२ पदवीधारक

दीक्षांत समारंभात ऑक्टोबर- नोव्हेंबर २०२३ व मार्च-एप्रिल २०२४ या परीक्षेत उत्तीर्ण पदवीधारकांना पदव्यांचे वितरण करण्यात येणार आहे. या दोन्ही परीक्षेत पदविका, पदवी, पदव्यूत्तर पदवी प्राप्त विद्यार्थी तसेच १४ जून २०२४ ते ८ फेब्रुवारी २०२५ या दरम्यान पीएच.डी प्राप्त करणा-या संशोधकांनी पदव्यांचे वितरण करण्यात येईल.यंदाच्या दीक्षांत सोहळयास पदवी प्राप्त करण्यासाठी एकुण ५६,१२२ विद्यार्थ्यांनी अर्ज दाखल केले आहेत. यामध्ये पदवीधर – ४२ हजार ६६६, पदव्यूत्तर पदवी १३ हजार १८७, एम.फिल धारक १६ व पीएच.डी. धारक १०६ जनांचा समावेश आहे. महाविद्यालयातील दीक्षांत समारंभ स्वतंत्र होतील. तर पदव्यूत्तर पदवी धारकांना संबंधित विभागात पदव्यांचे वितरण करण्यात येणार आहे, असे डॉ. भरती गवळी यांनी सांगितले.

चार इमारतींचे भूमिपूजन

उपराष्ट्रपती जगदीश धनखड यांच्या हस्ते आभासी पद्धतीने पीएम उषा प्रकल्पातंर्गत बांधण्यात येणाऱ्या चार इमारतींचे भूमीपूजन करण्यात येणार आहे. यामध्ये ‘स्ट्रेस बस्टर रिक्रेशन फॅसिलीटी सेंटर’ (खर्च – ९ कोटी ४८ लाख), सेंटर फॉर फोक अॅण्ड कल्चरल स्टडीज ऑफ मराठवाडा (६ कोटी ६२ लाख), स्टूडंटस् फॅसिलीट इन लायब्ररी अॅण्ड रिडींग रुम (३ कोटी ७५ लाख) तसेच सेंटर फॉर डिजीटल ट्रासफॉर्मेशन (७ कोटी ७४ लाख) अशा चार इमारतीचा समावेश आहे.