‘खिडकी गॅँग’चे दोन चोरटे गजाआड

पोलीस आयुक्त चिरंजीव प्रसाद यांनी गुरुवारी पत्रकार परिषदेत घरफोडी करणाऱ्या सराईत चोरट्यांवरील कारवाईची माहिती दिली. गेल्या एक वर्षापासून खिडकी गँग शहर आणि मराठवाड्यात धूमाकूळ घालत होती. यापूर्वी या गॅंगच्या ४ चोरट्यांना अटक झाली होती. त्यामधे सय्यद सिकंदर सय्यद अख्तर (रा.हर्सूल), बबलू, सिराज आणि शंकर तानाजी जाधव यांचा समावेश होता. नयापैकी जामिनावर सुटलेल्या शंकर तानाजी जाधव(३५) याने बाहेर येताच बीडमध्ये राहणाऱ्या बलबीर अमृत जाधव(३६) आणि चिंटू गायकवाड या दोघांना सोबत घेऊन शहरातील सिडको भागात २ आणि बेगमपुरा, हर्सूल भागात प्रत्येकी एक अशा चार घरफोड्या केल्या. जून तेऑक्टोबर या काळात हे गुन्हे करण्यात आले होते. २०१७ साली अटक केलेल्या सिराजला याबाबत माहिती विचारली असता त्याच्याकडून शंकर जाधवचे नाव गुन्हे शाखेला कळाले. पोलिस निरीक्षक मधुकर सावंत यांच्या मार्गदर्शनाखाली एपीआय अजबसिंग जारवाल यांनी बीडमधून शंकर जाधव आणि बलवीर अमृत जाधवला अटक केली. दोन्ही चोरट्यांनी गुन्ह्याची कबुली दिली असून ४ लाख २० हजारांचे सोन्याचे दागिने आणि एक मोबाईल पोलिसांना काढून दिला.