वाळू वाहतुकीतील वाहने सोडण्यासाठी लाखाची लाच; पैठणच्या तहसीलदारासह तिघे सापळ्यात

अप्पर जिल्हाधिकाऱ्यांनी १८ फेब्रुवारी रोजी वाळू वाहतुकी वाहने पकडली होती. पुढील कारवाईसाठी हे प्रकरण पैठणचे तहसीलदार सारंग चव्हाण यांच्याकडे वर्ग करण्यात आले. पैठणच्या महसूल विभागात तक्रारदार वाहने सोडवून आणण्यासाठी गेले असता तेथे महसूल सहायक हरीश शिंदे याने चलनासाठी ५० हजारांची मागणी केली. त्यावेळी तक्रारदाराने २० हजार रुपये दिले. काही दिवसांनी तक्रारदार तहसील कार्यालयात गेला तेव्हा तहसीलदारांच्या कक्षाबाहेर बसलेला सलीम शेख याने तक्रारदाराला सारंग चव्हाण यांची आेळख करून देण्याच्या बहाण्याने त्यांच्याकडे नेले. प्रकरणावर चर्चा झाली. शेख याने तक्रारदाराकडे दोन लाखांची मागणी केली. तडजोडीनंतर १ लाख १० हजार रुपये देण्याचे ठरले. मात्र, एवढी रक्कम नसल्याने तक्रारदाराने अहिल्यानगर लाचलुचपत प्रतिबंधक विभागाकडे तक्रार केली. विभागाच्या पोलीस उपअधीक्षक संगीता पाटील यांच्या पथकाने १८ फेब्रुवारीची पडताळणी करण्यात आली होती. काही संभाषणही पथकाच्या हाती लागले होते. त्यावरून तहसीलदार सारंग चव्हाण, सलीम शेख व हरीश शिंदे यांच्याविरुद्ध १ लाख १० हजारांची लाच मागितल्याचा गुन्हा पैठण पोलीस ठाण्यात दाखल करण्यात आला आहे. सलीम शेख व तहसीलदार सारंग चव्हाण यांना अटक करण्यात आली आहे.