छत्रपती संभाजीनगर : अहमदनगर येथे औरंगजेबाचे पोस्टर दाखविल्याने उडालेला गोंधळ, राज्यात या कारणामुळे होणाऱ्या दंगली या पार्श्वभूमीवर खुलताबाद येथील भारतीय पुरातत्त्व विभागाच्या ताब्यात असणाऱ्या औरंगजेबाच्या कबरीस वंचित बहुजन आघाडीचे अध्यक्ष प्रकाश आंबेडकर यांनी शनिवारी भेट दिली. या भेटीमुळे उद्धव ठाकरे यांची राजकीय कोंडी होण्याची शक्यता व्यक्त होत आहे.
आतापर्यंत शिवसेनेकडून कोणतीही प्रतिक्रिया व्यक्त झाली नाही, असे सांगून जे या भेटीमुळे माझ्यावर टीका करतील ते ‘जयचंद’च्या औलादी आहेत, असे समजा, अशा शब्दांत प्रकाश आंबेडकर यांनी या भेटीनंतर टीका केली. दरम्यान विरोधी पक्षनेते अंबादास दानवे यांनी आता औरंगजेबाचे थडगे उकरून काढण्याची काही एक आवश्यकता नव्हती, अशी एक वाक्याची प्रतिक्रिया ‘ लोकसत्ता’ शी बोलताना व्यक्त केली.
वंचित बहुजन आघाडीच्या कार्यकर्त्यांचे शिबिर खुलताबाद येथे घेण्यात आले. या शिबिरानंतर जरजरी बक्षचा दर्गा आणि औरंगजेबाच्या कबरीच्या संरक्षित स्मारकास प्रकाश आंबेडकर यांनी भेट दिली. काही महिन्यांपूर्वी एमआयएमचे अकबरोद्दीन ओवेसी आणि खासदार इम्तियाज जलील यांनी भेट दिली होती. त्यानंतर ॲड्. प्रकाश आंबेडकर यांनीही भेट दिली.
इतिहास इतिहास असतो तो पुसता येत नाही’, असे मत प्रकाश आंबेडकर यांनी व्यक्त केल्याचे वंचित बहुजन आघाडीचे प्रवक्ते सिद्धार्थ मोकळे यांनी सांगितले. या भेटीनंतर प्रकाश आंबेडकर यांनी भद्रा मारुतीच्या मंदिरासही भेट दिली. अनेकांचे श्रद्धास्थान असणाऱ्या स्थळांना भेटी दिल्या असून प्रत्येकाचा सन्मान राखला जावा, अशी भूमिका त्यांनी या भेटींनतर व्यक्त केली. या भेटीनंतर शिवसेना नेत्यांनी मात्र प्रतिक्रिया देण्याचे टाळले. ‘ शिवसेनेचे हिंदूत्व हे प्रबोधनकारांच्या विचाराचे आहे. बाबासाहेब आंबेडकर आणि प्रबोधनकार यांच्या लढय़ाचे स्वरूपही सारखे होते’ असे प्रकाश आंबेडकर म्हणाले.
