औरंगाबाद: गोदामात ठेवलेले स्वच्छतेचे सामान आगीत जळून खाक

येथील चेलीपुरा भागातील एका गोदामाला लागलेल्या आगीत झाडू, खराटे, फिनेल आदी स्वच्छतेच्या वस्तूंसह इतर साहित्य जळून खाक झाले. आग लागल्याची घटना मंगळवारी पहाटे ३.४५ च्या सुमारास घडली. तब्बल चार तासांच्या अथक प्रयत्नांनंतर आग विझवण्यात यश आले असून या घटनेत सुमारे एक कोटींचे साहित्य जळून खाक झाल्याचा अंदाज व्यक्त करण्यात आला आहे. गोदामातील आगीची झळ लागून लगतच्या चार ते पाच घरांमधील साहित्य निकामी झाले असून भिंतीनाही तडे गेल्याची माहिती अग्निशमन विभागाकडून देण्यात आली.