छत्रपती संभाजीनगर – समृद्धीवर महामार्गावरील हर्सूल-सावंगी परिसरात ट्रकला पाठीमागून भरधाव कारने शुक्रवारी रात्री ९ च्या सुमारास धडक देऊन झालेल्या भीषण अपघातात दोन ठार तर एक गंभीर जखमी आहे. चालक सुखरूप आहे. मृत दोघे हे ३५ व ४० वयोगटातील तरुण असून ते भंडारा शहरातील असल्याची प्राथमिक माहिती समोर येत आहे.
हेही वाचा >>> अशोक चव्हाण यांच्या प्रवेशामुळे भाजपचे खासदार प्रताप चिखलीकर यांच्या उमेदवारीवर प्रश्नचिन्ह
आशिष सरवदे (३७, भंडारा) हे गंभीर जमखी असून त्यांच्यावर घाटी रुग्णालयात उपचार सुरु आहेत. चालक रितेश भानादकर (२४) हा सुखरूप असल्याची माहिती महामार्ग पोलिसांनी दिली. भंडाऱ्यातील चौघे कारने (क्र. एमएच ४३, एएल ८०२१) मुंबईला गेले होते. ८ मार्च रोजी ते भडाऱ्याकडे परतत असताना त्यांची कार समृद्धी महामार्गाने चॅनल क्र. ४३६ जवळ आली तेव्हा समोर लोडिंग ट्रक (क्र. सीजी १५, डीबी ७१५८) जात होता. ट्रक त्याच्या लेनमधून धावत होता. घाटासारखा रस्ता असल्याने ट्रकची गती मंद होती. त्या ट्रकवर पाठीमागून भरधाव कारने धडकली.