How Not To Refuel: आजकाल बहुतांश लोकांकडे खासगी गाडी असते. काहीजण दुचाकी चालवतात, तर काहीजणांकडे चारचाकी कार असते. जेव्हा स्कूटर, बाईक किंवा कारमध्ये पेट्रोल/ डिझेल कमी होते, तेव्हा पेट्रो पंपावर जाऊन त्यामध्ये इंधन भरावे लागते. वाहनांमध्ये इंधन भरताना आपण नकळत काही चुका करतो. या लहानसहान चुका अनेकांना नगण्य वाटतात. पण दीर्घकाळ या चुका केल्याने भविष्यात त्रास होऊ शकतो. तर काही चुका आपल्यासाठी घातक ठरु शकतात.
Hindustan times ने दिलेल्या माहितीनुसार, Refuelling करताना काही मूलभूत गोष्टी फॉलो न केल्याने इंधन भरणे त्रासदायक ठरु शकते. जर तुम्ही पेट्रोल पंपावर जाऊन कार किंवा बाईकच्या इंधनाची टाकी भरणार असाल, तर या चुका टाळणे तुमच्यासाठी फायदेशीर ठरु शकते.
इंधनाची किंमत तपासा.
पेट्रोल पंपावर जाण्याआधी इंधनाच्या किंमतीची माहिती घ्यावी. सामान्यत: प्रत्येक इंधन भरण्याच्या स्टेशनवर पेट्रोल आणि डिझेलच्या सुधारित दर दिलेले असतात. इंधनाची पेट्रोल पंपावरील किंमत आणि तेल विपणन कंपन्यानी घोषित केलेली किंमत समान आहे की नाही हे तपासून घ्या. यामुळे तुमची फसवणूक होणार नाही, तसेच तुमचे पैसेदेखील वाचतील.
Fuel dispenser शून्यावर सेट असल्याचे सुनिश्चित करा.
वाहनामध्ये इंधन भरायला सुरुवात करण्यापूर्वी Fuel dispenser मशीन शून्यावर असल्याची खात्री करुन घ्यावी. असे न केल्यास पंपावरील लोक तुम्हाला फसवू शकतात. अशा प्रकारे सर्वसामान्यांची सहज फसवणूक केली जाते. या फसवणूकीला बळी न पडण्यासाठी इंधन भरण्यापूर्वी Fuel dispenser शून्यावर सेट आहे की नाही हे तपासून घ्यावे.
इंजिन बंद करावे.
इंधन भरताना नेहमी गाडीचे इंजिन बंद ठेवावे. पेट्रोल आणि डिझेल हे अत्यंत ज्वलनशील असते. इंजिन सुरु असल्याने अचानक अपघात होण्याची शक्यता असते. त्यामुळे पेट्रोल पंपावर इंधन भरायला गेल्यावर इंजिन बंद करायला सांगितले जाते.
ऑटो-कट केल्यानंतर इंधनाची टाकी भरणे टाळा.
पेट्रोल पंपामध्ये Fuel dispenser सह ऑटो-कट फंक्शन देखील असतात. यामुळे इंधनाची टाकी ठराविक प्रमाणात भरल्यावर इंधन भरणे थांबवते. वाहनाची टाकी भरल्यानंतर त्यामध्ये पेट्रोल/ डिझेल काठोकाठ भरु नका. ऑटो-कट केल्यानंतर इंधनाची टाकी भरणे थांबवा. असे केल्याने इंधनाची बचत होते.
मोबाईल फोन, लायटरचा वापर करु नका.
पेट्रोल, डिझेल सारखे अत्यंत ज्वलनशील द्रव्य असलेल्या ठिकाणी मोबाईलचा वापर करणे टाळावे. पेट्रोल पंपावर लायटर वापरु नये. मोबाईलमधील Electromagnetic waves मुळे तसेच लायटरच्या एका छोट्याशा ठिणगीमुळे मोठा अपघात होऊ शकतो.
