Maruti Suzuki Opts Cow Dung for Green Solutions: मारुती सुझुकी ही देशातील वाहन उत्पादन करणारी अग्रगण्य कंपनी आहे. प्रवासी वाहनांचे उत्पादन करणारी ही कंपनी असून, आपल्या ग्राहकांसाठी नवनवीन मॉडेल्स बाजारामध्ये लाँच करत असते. असे म्हटले जाते की गायींकडून मिळणारी प्रत्येक गोष्ट जसे की दूध, गोमूत्र आणि शेण हे उपयोगी आहेत. यामधील शेणाचा वापर आता हीच मारुती सुझुकी कंपनी ग्रीन सोल्युशनसाठी करणार आहे. तसेच या प्रकल्पातून २०३० पर्यंत कंपनीने ६ नवीन इलेक्ट्रिक वाहने बाजारात आणायची तयारी सुरु केली आहे. एका अहवालानुसार, भारतीय कार बाजारात मारुती सुझुकीच्या सीएनजी वाहनांचा वाटा सुमारे ७० टक्के आहे. अशा परिस्थितीत मारुती सुझुकीचे सीएनजी मॉडेल बायोगॅसने चालवता आले, तर ती क्रांतीच ठरेल. यासाठी कंपनी नवीन तंत्रज्ञान विकसित करत आहे. सुझुकी आगामी काळात आफ्रिका, आसियान आणि जपानसह अनेक देशांमध्ये बायोगॅस सुरू करून निर्यात करण्याचा विचार करत आहे. (हे ही वाचा : Ola ची ऑफर वाचली का? देशातली बेस्ट सेलिंग इलेक्ट्रिक स्कूटरवर देतेय बंपर सूट, होणार ‘इतक्या’ रुपयांची बचत) कंपनीच्या म्हणण्यानुसार, भारतातील बायोगॅस केवळ कार्बन उत्सर्जन कमी करण्यास हातभार लावणार नाही तर आर्थिक विकासालाही चालना देईल. यासोबतच ग्रामीण भागातही मोठा हातभार लागणार आहे. कंपनीने सांगितले की, यासाठी सुझुकीने भारत सरकारच्या नॅशनल डेअरी डेव्हलपमेंट बोर्ड आणि बनास डेअरीसोबत सामंजस्य करारही केला आहे. यासोबतच तंत्रज्ञानाच्या विकासासाठी कंपनीने फुजिसन असागिरी बायोमास या जपानमधील शेणापासून बायोगॅस तयार करणाऱ्या कंपनीतही गुंतवणूक केली असून त्यांच्यासोबत मिळून तंत्रज्ञान विकसित करण्याचे काम सुरू आहे. कंपनी सतत इलेक्ट्रिक, फ्लेक्स इंधन आणि बायोगॅसच्या प्रकल्पांवर लक्ष केंद्रित करत आहे. वाढते प्रदूषण आणि महागडे तंत्रज्ञान हाताळण्यासाठी कंपनीने बायोगॅस प्रकल्पाचे काम सुरू केले आहे. शेणापासून बायोगॅस तयार केला जातो, त्यामुळे आपल्या देशात त्याची निर्मिती करण्यास कोणतीही अडचण येणार नाही. देशातील गावांमध्ये दुग्धजन्य कचऱ्याचे प्रमाण जास्त असून त्याच्या मदतीने बायोगॅस सहज तयार करता येतो.
