Toyota ही एक लोकप्रिय वाहन निर्माती कंपनी आहे. कंपनी आपल्या ग्राहकांसाठी कायमच नवनवीन मॉडेल्स लॉन्च करतच असते. टोयोटा ऑगस्ट २०२३ या महिन्याच्या अखेरीस आपली Rumion MPV लॉन्च करणार आहे. त्याद्धी त्याचे बुकिंग सुरू होईल. उपलब्ध माहितीनुसार, या MPV ची डिलिव्हरी सप्टेंबर महिन्याच्या अखेरीस सुरू होईल. सध्या या एमपीव्हीची विक्री दक्षिण आफ्रिकेमध्ये केली जाते. Rumion हे मॉडेल मारूती सुझुकी अर्टिगावर आधारित आहे. हे मॉडेल टोयोटा आणि मारूती सुझुकी यांच्यामधील चौथे बॅज इंजिनिअर्ड मॉडेल आहे. हे मॉडेल मारूती सुझुकी तयार करणार असून याचा पुरवठा देखील मारूती सुझुकी करणार आहे.
Rumion सह टोयोटाकडे देशातील सर्वात मोठा MPV पोर्टफोलिओ आहे. ज्यामध्ये इनोव्हा क्रिस्टा, इनोव्हा हायक्रॉस आणि वेलफायर यांचा समावेश आहे. याबाबतचे वृत्त autocarindia ने दिले आहे.
टोयोटा Rumion एक्सटेरिअर आणि इंटेरिअर
मारुती बलेनो आणि टोयोटा ग्लांझा प्रमाणेच Rumion या मॉडेलची स्टाइल अर्टिगापेक्षा थोडे वेगळे असेल. टोयोटाच्या या नवीन मॉडेलमध्ये अपडेटेड फॉग लॅम्प हाऊसिंग, इनोव्हा क्रिस्टासारखी ग्रील आणि नवीन ड्युअल टन अलॉय व्हीलसह नवीन बंपर मिळेल. या नवीन मॉडेलच्या इंटेरिअरबद्दल बोलायचे झाल्यास Rumion त्याची फीचर्सची यादी Ertiga सह शेअर करते. ७ सीट्स, वायरलेस अँड्रॉइड ऑटो, Apple कार प्लेसह ७ इंचाचा टचस्क्रीन, Arkamys साउंड सिस्टीम आणि सुरक्षेच्या दृष्टीने यात चार एअरबॅग्स, EBD सह ABD आणि इलेक्ट्रॉनिक स्टॅबिलिटी प्रोग्रॅम आणि सर्व सीट्ससाठी सीट बेल्ट रिमाइंडर्स असे फिचर यामध्ये मिळू शकतात.
इंजिन
Rumion मध्ये अर्टिगाप्रमाणेच १.५ लिटरचे पेट्रोल इंजिन मिळते. जे १०३ एचपी पॉवर आणि १३७ एनएम टॉर्क जनरेट करते. तसेच ते ५-स्पीड किंवा ६-स्पीड ऑटोमॅटिक गिअरबॉक्सशी जोडलेले असणार आहे. यामध्ये फॅक्टरी फिटेड सीएनजी किट देखील मिळणार आहे. Rumion पेट्रोलवर २०.५१ किमी प्रतिलिटर आणि सीएनजीवर २६.११ किमी प्रतिकिलो धावू शकते असा टोयोटाचा दावा आहे.
स्पर्धा
Rumion एमपीव्ही लॉन्च झाल्यांनतर मारुती सुझुकी अर्टिगा, मारूती सुझुकी XL6 आणि किआ Carens यांच्याशी स्पर्धा करेल.
