आजकाल आपल्या देशामध्ये वाहनांच्या खरेदीचे प्रमाण वाढले आहे. आर्थिक स्थिती आणि राहणीमान सुधारल्याने बहुतांश लोक खासगी वाहन वापरत आहेत. पण यामुळे ट्रॅफिक जामचा गंभीर प्रश्न आणखी मोठा होत चालला आहे. रस्त्यावर दुतर्फा गाड्याच गाड्या पाहायला मिळतात. एखाद्या महत्त्वपूर्ण कामासाठी ठराविक जागी वेळेत पोहोचायचे असताना ट्रॅफिक लागल्याने उशीर होऊ शकतो. ट्रॅफिकमध्ये अडकल्याने वेळ आणि इंधन दोन्ही खर्च होत असते. तसं पाहायला गेलं तर ट्रॅफिक होणं आपण रोखू शकत नाही, पण ते टाळण्यासाठी नक्कीच काहीतरी करु शकतो.
वृत्तवाहिन्यांद्वारे ट्रॅफिक रिपोर्ट्सची माहिती मिळवा.
कोणत्या रस्त्यावर गर्दी आहे; कोणत्या ठिकाणी वाहतूक कोंडी होऊ शकते किंवा गर्दी टाळण्यासाठी कोणत्या मार्गावरुन जाणए टाळावे अशा गोष्टींची माहिती अनेक स्थानिक वृत्तवाहिन्या देत असतात. रेडिओ चॅलन देखील ही माहिती देत असतात. ट्रॅफिक पोलिस आणि स्थानिक चॅनलचे सोशल मीडिया हॅंडल्स फॉलो करुन ट्रॅफिक रिपोर्ट्सची माहिती मिळवता येते. यावरुन कोणत्या रस्त्यावरुन जायचे आहे हे ठरवू शकता.
पर्यायी मार्ग जाणून घ्या.
गंतव्यस्थानी पोहचण्यासाठीच्या विविध मार्गांबद्दल जाणून घेतल्याने तुम्ही ट्रॅफिकमध्ये अडकणे टाळू शकता. जर एखाद्या रस्त्यावर वाहनांची गर्दी असेल, तर तुम्ही दुसऱ्या रस्त्यावरुन पुढे जाऊ शकता. पर्यायी मार्ग जाणून घेतल्याने तुम्ही गंतव्यस्थानापर्यंत लवकरात लवकर पोहचू शकाल.
Peak Hours मध्ये घराबाहेर जाणे टाळा.
सकाळी असंख्य लोक ऑफिसला जात असतात. हे लोक संध्याकाळी ऑफिसवरुन घरी येत असतात. त्याचप्रमाणे सकाळी मुलं शाळा, कॉलेजला जाण्यासाठी घराबाहेर पडत असतात. तेव्हा सकाळी आणि संध्याकाळी काही ठराविक तासांमध्ये रस्त्यावर भरपूर गर्दी असते. Peak Hours ला होणारा ट्रॅफिक जाम टाळण्यासाठी घरातून किंवा ऑफिसमधून थोड लवकर निघावे. तुम्ही प्रवासाचे योग्य नियोजन देखील करु शकता.
Traffic apps ची मदत घ्या.
सध्या गुगल प्ले स्टोअरवर अनेक अ‍ॅप्स उपलब्ध आहेत, ज्यांच्यामार्फत ट्रॅफिकचे रिअल टाइम अपडेट्स मिळवता येतात. या अ‍ॅप्सचा मदतीने तुम्ही गर्दी असलेल्या जागी जाणे टाळू शकता.
गरज नसल्यास वाहनाचा वापर कमी करा.
गाडी घेतल्यानंतर अनेकांना चालायला कंटाळा येतो. काही वेळेस वाहनाची इतकी सवय लागते, की लोक ५ मिनिटावर जाण्यासाठीही गाडी वापरतात. यामुळे ट्रॅफिक जाम होण्याची शक्यता वाढते. कधीकधी गाडी पार्क करताना इतरांना त्रास होतो. त्यामुळे गरज नसल्यास गाडीऐवजी पायी चालत गंतव्यस्थानी जा. शक्य असल्यास सायकलचा वापर करा.
