माहितीजाल

वजनाच्या काटय़ावर उभे राहिल्यास काटा का थरथरतो?
वजन करताना स्थिर उभे राहा, असे सांगण्यात येते. आपले नेमके वजन समजावे यासाठी हे आवश्यक असते. पण वजनाचा काटा सूक्ष्म फरक दाखवणारा असेल तर असा फरक हमखास दिसतो. वजन करायला उभे राहिले असताना वजन दर्शवणाऱ्या सुईची वरच्या दिशेने होणारी थरथर ही नाडीच्या ठोक्याशी जुळणारी असते. हा फरक समजून घेण्यासाठी न्यूटनचे गतीविषयीचे नियम नजरेसमोर आणावे लागतील. प्रत्येक बदलाच्या विरुद्ध दिशेने तेवढेच बल कार्यरत असते.  इथे हृदयाच्या झडपेतून बाहेर पडणारे रक्त दाब देत असते. जोराने बाहेर पडणाऱ्या रक्तामुळे सुई किंचित थरथरते. हृदयाच्या झडपेच्या उघडमिट होण्याच्या क्रियेत रक्त एक तर बाहेर फेकले जात असते किंवा हृदयात शिरत असते. ही हालचाल सुईच्या थरथरण्यात दिसून येते.