पैसा जिंकला, काम हरले; राज ठाकरेंची खंत

गेल्या पाच वर्षांमध्ये नाशिक महानगर पालिकेमध्ये आम्ही खूप कामे केली. बाहेरुन पैसा आणून ओतला. नाशिक शहराचा कायापालट केला परंतु नाशिकच्या लोकांनी मात्र बाहेरुन आलेल्या लोकांना निवडून दिले. ही बाब अतिशय खराब आहे असे ते म्हणाले. तुम्ही जो पायंडा पाडला आहे त्याने तुमचेच भविष्यात नुकसान होणार आहे असे ते म्हणाले. ज्या भारतीय जनता पक्षाने सर्व पक्षातून लोकांची आयात केली त्यांना तुम्ही जिंकवून दिले असे ते म्हणाले.

या पुढे मात्र महाराष्ट्र नवनिर्माण सेना कदापिही हरणार नाही ही गोष्ट ध्यानात ठेवा असे ते म्हणाले. गेल्या कित्येक वर्षांपासून आपण केवळ सौम्य धोरणाचा वापर करुनच निवडणुकांना सामोरे गेलो आहोत परंतु यापुढे मात्र आपण सर्व विरोधक ज्या मार्गांचा अवलंब करत आहेत ते मार्ग अवलंब करणार आहोत असा इशारा त्यांनी दिला. या आधी तुम्ही लोक मला भेटण्यासाठी येत होता परंतु यापुढे मात्र माझे सर्व नेते आणि मी तुमच्या भेटीला येत जाणार आहोत असे त्यांनी यावेळी म्हटले.

आपण केवळ हे तुमचा धीर वाढवण्यासाठी म्हणत नाही असे देखील ते म्हणाले. विरोधक जे फासे टाकत होते तेच फासे आता माझ्या हाती आले आहेत. तेव्हा ही शेवटची निवडणूक आहे ज्यामध्ये मनसेला हार पत्करावी लागली आहे. यापुढे आपला केवळ विजय होईल असे म्हणून त्यांनी कार्यकर्त्यांचा उत्साह वाढवला.