FirstCry IPO Sachin Tendulkar Profit: ‘फर्स्टक्राय’ची पालक कंपनी असलेल्या ब्रेनबीज सोल्युशन्सचा समभाग प्रारंभिक समभाग विक्रीच्या माध्यमातून वितरित करण्यात आलेल्या ४६५ रुपयांच्या तुलनेत दिवसअखेर तो ४६.०६ टक्क्यांनी वधारून ६७९.१० रुपयांवर स्थिरावला. या आयपीओमधून काही दिग्गज गुंतवणूकदारांनी बक्कळ पैसे कमविले आहेत. माजी क्रिकेटपटू सचिन तेंडुलकर, हर्ष मारीवाला, रंजन पै आणि कंवलजीत सिंह यांनी या आयपोओच्या माध्यमातून चांगला नफा कमविला आहे. आयपीओ जाहीर झाल्यानंतर या सुरुवातीच्या सत्रात १० टक्क्यांची घसरण झाल्यामुळे गुंतवणूकदारांचे थोडेसे नुकसान झाले, मात्र नंतर हे नुकसान भरून निघाले.
सचिन तेंडुलकर आणि इतर गुंतवणूकदारांनी हा आयपीओ ४८७.४४ खरेदी केला होता. त्यात दिवसअखेर ४५ टक्क्यांची वाढ झाली. त्यामुळे सचिन तेंडुलकरसह इतर मोठ्या गुंतवणूकदारांनी ३८ टक्क्यांचा नफा नोंदविला.
सचिन तेंडुलकर यांचा नेमका नफा किती?
माजी क्रिकेटपटू सचिन तेंडुलकरने फर्स्टक्राय आयपीओमध्ये ९.९९ कोटींची गुंतवणूक केली होती. समभाग वधारल्यानंतर ही गुंतवणूक १३.८२ कोटींवर पोहोचली. तर टाटा सन्सचे माजी अध्यक्ष रतन टाटा यांच्याकडे आयपीओ येण्याआधी फर्स्टक्रायचे ७७,९०० समभाग होते. ८४.७२ रुपये या सरासरीने त्यांनी हे समभाग विकत घेतले होते. रतन टाटा यांनी यापैकी अनेक समभाग विकल्याचे सांगितले जात आहे, मात्र त्यांनी किती समभाग विकले, याची ठाम माहिती समजलेली नाही.
रतन टाटा यांनी ज्या किंमतीमध्ये फर्स्टक्रायचे समभाग विकत घेतले होते, त्या तुलनेत आयपीओ ज्या किमतीला जाहीर झाला, त्यामध्ये रतन टाटा यांनी पाच पट अधिक नफा कमावला आहे. जर टाटा हे समभाग न विकता कायम ठेवणार असतील तर त्यांचा नफा सात पटीने अधिक वाढलेला असेल. याचबरोबर महिंद्रा आणि महिंद्राने ७७.९६ रुपयांना एक समभाग याप्रमाणे फर्स्टक्रायने ११ टक्के समभाग विकत घेतले होते. महिंद्रा आणि महिंद्रानेही सात पटीने अधिक नफा मिळविला आहे.
मागच्या वर्षी सॉफ्टबँक आणि फर्स्टक्रायचे संस्थापक सुपम माहेश्वरी यांनी आपल्याकडी समभागांची विक्री केली होती. माहेश्वरी यांच्याकडे सध्या कंपनीचे ५.९५ टक्के समभाग आहेत. आयपीओच्या आधी २०२३ साली त्यांनी ३०० कोटींच्या समभागांची विक्री केली होती.
सचिन तेंडुलकर आणि त्यांची पत्नी अंजली यांनी फर्स्टक्रायचे दोन लाख समभाग विकत घेतले आहेत. तर मारीवाला कुटुबांने २०.५ लाख समभाग विकत घेतले आहेत. रंजन पै यांच्या कुटुंबाने ५१.३लाख, कंवलजीत सिंह यांनी तीन लाख, इन्फोसिसचे सहसंस्थापक क्रिस गोपाळकृष्णन कुटुंबाने ६ लाख आणि डीएसपीच्या संस्थापक हेमांद्री कोठारी यांनी ८ लाख २० हजार समभाग विकत घेतले आहेत.
