जगातील आघाडीची मोटार उत्पादक कंपनी टेस्ला नवीन वर्षात म्हणजे जानेवारी २०२४ मध्ये भारतातील बाजारपेठेत आगमन होण्याची शक्यता आहे. अशातच केंद्रीय मंत्री पीयूष गोयल यांनी कॅलिफोर्निया येथील टेस्ला मोटार उत्पादन होत असलेल्या कारखान्याला भेट दिली. मात्र, टेस्लाचे सर्वेसर्वा एलॉन मस्क यांनी पियुष गोयल यांची माफी मागितली आहे.
नेमकं काय झालं?
पीयुष गोयल यांनी कॅलिफोर्निया येथील टेस्ला मोटार उत्पादन होत असलेल्या कारखान्याला भेट दिली. पण, प्रकृतीच्या कारणास्तव मस्क यांना पियुष गोयल यांना भेटता आलं नाही. म्हणून मस्क यांनी ‘एक्स’ ( ट्वीटर ) अकाउंटवरून पियुष गोयल यांची माफी मागितली आहे.
हेही वाचा : टेस्ला कंपनी आता भारतात वाहनांचे उत्पादन करणार? वर्षभरात कोणत्या गोष्टी बदलल्या?
पीयूष गोयल ‘एक्स’ अकाउंटवर म्हणाले, “कॅलिफॉर्निया येथील टेस्लाच्या मोटार उत्पादन कारखान्यास भेट दिली. टेस्लात भारतीय अभियांत्रिक वरिष्ठ पदावर काम करतात. ते टेस्लाच्या परिवर्तनामध्ये देत असलेल्या योगदानाबद्दल पाहून आनंद झाला.”
हेही वाचा : Tesla पुण्यात! भारतातील पहिले कार्यालय विमाननगरमध्ये
“टेस्लाने वाहनिर्मितीसाठी भारतातून सुटे भाग आयात केले आहेत. याचा अभिमान वाटतो. आगामी काळात सुटे भागाची आयात दुप्पट होण्याची शक्यता आहे. मस्क यांची प्रकृती सुधारण्यासाठी शुभेच्छा,” असं पियुष गोयल यांनी म्हटलं.
यावर एलॉन मस्क म्हणाले, “तुम्ही टेस्लाला दिलेली भेट ही अभिमानास्पद बाब आहे. कॅलिफोर्नियाला येथे आपली भेट घेऊ शकलो नाही, याबद्दल दिलगीरी व्यक्त करतो. लवकरच आपली भेट होईल, अशी आशा व्यक्त करतो.”
