पुणे : बँक ऑफ महाराष्ट्रला (महाबँक) सप्टेंबरअखेर तिमाहीत १,३२७ कोटी रुपयांचा नफा झाला आहे. गेल्या वर्षीच्या तुलनेत बँकेच्या नफ्यात ४४ टक्क्यांची भरीव वाढ झाली आहे.

महाबँकेचे व्यवस्थापकीय संचालक निधू सक्सेना यांनी बँकेचे तिमाही निकाल मंगळवारी जाहीर केले. त्यानुसार, बँकेच्या निव्वळ व्याज नफ्यात ३.९८ टक्के वाढ झाली आहे. गेल्या वर्षी याच तिमाहीत ही वाढ ३.८८ टक्के होती. सार्वजनिक क्षेत्रातील १२ बँकांचा विचार करता महाबँकेचा निव्वळ व्याज नफा सर्वाधिक आहे. चालू आर्थिक वर्षात निव्वळ व्याज नफा ३.७५ ते ३.८५ टक्के राखण्यासह, आर्थिक वर्षातील निव्वळ नफा ५,००० कोटी रुपयांवर नेण्याचे उद्दिष्ट असल्याचे ते म्हणाले. गेल्या आर्थिक वर्षात बँकेने ४,०५५ कोटी रुपयांचा नफा कमावला होता.

आणखी वाचा

हेही वाचा >>>खाद्यान्नांच्या किमतीतील भडक्याने कहर; किरकोळ महागाई साडेपाच टक्क्यांच्या नऊमाही उच्चांकाला

महाबँकेने पहिल्या सहामाहीत २,५०० कोटी रुपयांचा निव्वळ मिळविला आहे. पुढील दोन तिमाहीतही नफ्यात याच गतीने वाढ अपेक्षित आहे. बँकेने जुलै ते सप्टेंबर या दुसऱ्या तिमाहीत ६,०१७ कोटी रुपयांचे व्याज उत्पन्न मिळविले असून, गेल्या वर्षी याच तिमाहीत ते ५,०६८ कोटी रुपये होते. बँकेचे निव्वळ व्याज उत्पन्न गेल्या वर्षीच्या तुलनेत १५.४१ टक्क्यांनी वाढून २,८०७ कोटी रुपयांवर पोहोचले आहे. बँकेच्या निव्वळ बुडीत कर्जांचा दर ०.२३ टक्क्यांवरून ०.२० टक्क्यांवर खाली आला आहे, असे सक्सेना यांनी सांगितले.

महाबँकेचे तिमाही निकाल (जुलै ते सप्टेंबर)

– एकूण व्यवसाय – ४,९३,७९३ कोटी

– एकूण ठेवी – २,७६,२८९ कोटी

– कर्ज वितरण – २,१७,५०४ कोटी

– निव्वळ नफा – १,३२७ कोटी रुपये