2000 Note Withdrawal : रिझर्व्ह बँक ऑफ इंडियाने (RBI) १९ मे रोजी २,००० रुपयांच्या नोटा बाजारातून मागे घेण्याची घोषणा केली. २००० रुपयांच्या नोटा वितरणातून बाद करण्याचा निर्णय घेतल्यापासून ३० जूनपर्यंत एकूण ३.६२ लाख कोटी रुपयांपैकी २.७२ लाख कोटी रुपये म्हणजेच ७६ टक्के नोटा बँकांमध्ये परत आल्या आहेत.
३० सप्टेंबरपर्यंत नोटा बदलण्याची / जमा करण्याची संधी
१९ मे रोजी मध्यवर्ती बँकेने अचानक २००० रुपयांच्या नोटा वितरणातून बाद करण्याचा निर्णय घेतला. लोकांना ३० सप्टेंबरपर्यंत त्यांच्या बँक खात्यात २००० रुपयांच्या नोटा जमा करण्यास किंवा इतर मूल्यांच्या नोटा बदलण्यास सांगितले आहे. मूल्याच्या बाबतीत मार्च २०२३ मध्ये एकूण ३.६२ लाख कोटी रुपयांच्या नोटा २००० रुपयांच्या होत्या. २००० रुपयांच्या नोटा वितरणातून बाद करण्याचा निर्णय घेतल्यानंतर ३० जूनपर्यंत एकूण ३.६२ लाख कोटी रुपयांपैकी २.७२ लाख कोटी रुपयांहून अधिक रक्कम बँकांकडे परत आली आहे. ३० जूनपर्यंत बाजारात २००० रुपयांच्या नोटांचे चलन ०.८४ लाख कोटी रुपये आहे. म्हणजेच १९ मे २०२३ पासून आतापर्यंत २००० रुपयांच्या ७६ टक्के नोटा बँकांकडे परत आल्या आहेत.
हेही वाचाः मोदी सरकार आता ‘या’ सरकारी बँकेतील ४९ टक्के भागीदारी विकणार; क्रेडिट कार्ड व्यवसायावर परिणाम होणार
८७ टक्के नोटा बँकांमध्ये जमा झाल्यात
आरबीआयच्या आकडेवारीनुसार, परत आलेल्या २००० रुपयांच्या ८७ टक्के नोटा जमा करण्यात आल्यात, तर १३ टक्के नोटा बदलून देण्यात आल्यात. लोकांना ३० सप्टेंबरपर्यंत २००० रुपयांच्या नोटा बदलून किंवा जमा करण्याची संधी आहे.
हेही वाचाः केंद्रीय कर्मचाऱ्यांसाठी डबल धमाका, डीएबरोबर ‘हा’ भत्ताही वाढण्याची शक्यता
जनहित याचिका फेटाळली
२००० रुपयांच्या नोटा चलनातून बाद करण्याच्या रिझर्व्ह बँक ऑफ इंडियाच्या (RBI) निर्णयाला आव्हान देणारी जनहित याचिका दिल्ली उच्च न्यायालयाने फेटाळून लावली. सरन्यायाधीश सतीश चंद्र शर्मा आणि न्यायमूर्ती सुब्रमण्यम प्रसाद यांनी ही याचिका फेटाळून लावली. यापूर्वी या याचिकेवरील निकाल ३० मे रोजी राखून ठेवण्यात आला होता.
