पीटीआय, नवी दिल्ली
बांधकाम व्यावसायिक अभिषेक लोढा आणि त्यांच्या कुटुंबीयांनी शुक्रवारी त्यांच्या मॅक्रोटेक डेव्हलपर्स लिमिटेड या कंपनीतील १८.०९ टक्के हिस्सा हा धर्मादाय कार्यासाठी दिला. समूहातील ‘लोढा फिलान्थ्रॉपी फाऊंडेशन’ला (एलपीएफ) हा २१ हजार कोटी रुपयांचा हिस्सा हस्तांतरित करण्यात आला आहे.
टाटा उद्योगसमूहाने देशात व्यवसायासह समाजाचे ऋण म्हणून अनेक लोकोपयोगी उपक्रमांसाठी विश्वस्त न्यास आणि सढळ आर्थिक मदतीचा आखून दिलेल्या पाऊलवाटेवर लोढा कुटुंबीयांनी मार्गक्रमण सुरू केल्याचे या निमित्ताने म्हटले जात आहे.मॅक्रोटेक डेव्हलपर्स ही देशातील आघाडीची गृहनिर्माण क्षेत्रातील कंपनी आहे. कंपनीचे बाजारमूल्य १.१७ लाख कोटी रुपये असून, कंपनीत प्रवर्तकांचा हिस्सा ७२.११ टक्के आहे. अभिषेक लोढा आणि त्यांच्या कुटुंबीयांनी समूहातील लोढा फिलान्थ्रॉपी फाऊंडेशन या स्वयंसेवी संस्थेला मॅक्रोटेकमधील १८.०९ टक्के हिस्सा हस्तांतरित केला. भांडवली बाजार शुक्रवारी बाजार बंद होताना मॅक्रोटेकच्या समभागाचे मूल्य १,१७५ रुपये होते.
हेही वाचा >>>स्टेट बँकेला १८,३३१ कोटींचा तिमाही नफा
यामुळे संस्थेला एकूण २१ हजार कोटी रुपयांचा हिस्सा मिळाला आहे. ही संस्था राष्ट्रीय आणि सामाजिक कार्यासाठी या निधीचा वापर करेल. मॅक्रोटेक डेव्हलपर्सचे व्यवस्थापकीय संचालक व मुख्याधिकारी अभिषेक लोढा यांनी २८ ऑक्टोबरला याबाबत घोषणा केली होती. ते आणि त्यांचे कुटुंबीय २० हजार कोटी रुपयांचा हिस्सा लोढा फिलान्थ्रॉपी फाऊंडेशनला देतील, असे त्यांनी जाहीर केले होते. या संस्थेच्या माध्यमातून सामाजिक उपक्रम राबविण्यासाठी सल्लागार मंडळ पुढील वर्षी जानेवारी महिन्यात स्थापन केले जाणार आहे. देशात आद्य उद्योगघराणे असलेल्या टाटा कुटुंबीयांनी त्यांच्याकडील मोठा हिस्सा टाटा विश्वस्त न्यासांना हस्तांतरित केला आहे. या न्यासांच्या माध्यमातून मोठ्या प्रमाणात शिक्षण, आरोग्य, संशोधन क्षेत्रात काम सुरू आहे.
