लोकसत्ता व्यापार प्रतिनिधी
मुंबई : अदानी समूहाने अमेरिकी कंपनी जीक्यूजी पार्टनर्सला समूहातील चार कंपन्यांच्या समभागांची सुमारे १५,४४६ कोटी रुपयांनी विक्री केली. अदानी समूहातील अदानी पोर्ट्स आणि स्पेशल इकॉनॉमिक झोन लिमिटेड, अदानी ग्रीन एनर्जी लिमिटेड, अदानी ट्रान्समिशन लिमिटेड आणि अदानी एंटरप्रायझेस लिमिटेडमधील सुमारे १७.२ कोटी समभाग एक गठ्ठा माध्यमातून विक्री केले. जीक्यूजी पार्टनर्सच्या अदानी समूहातील समभाग खरेदीमुळे त्यांना भारतीय पायाभूत सुविधांच्या विकासातील वाढीसाठी एक प्रमुख गुंतवणूकदार बनवले आहे, असे मुंबई शेअर बाजाराला दिलेल्या पत्रकात म्हटले आहे.
घोडदौड कायम
अदानी समूहातील कंपन्यांनी गुरुवारच्या सत्रात घोडदौड कायम राखली. समूहातील सर्व दहा सूचिबद्ध कंपन्यांचे एकत्रित बाजार भांडवल ७.८६ लाख कोटी रुपयांवर पोहोचले आहे. तर गेल्या दोन सत्रांमध्ये दहा कंपन्यांच्या एकूण बाजारभांडवलात ७४,३०२.४७ कोटी रुपयांची भर पडली आहे.
