वृत्तसंस्था, नवी दिल्ली
वाहननिर्मिती क्षेत्रातील आघाडीची कंपनी असलेल्या टाटा मोटर्सने तिची प्रवासी वाहने आणि वाणिज्य वाहनांचे व्यवसाय दोन स्वतंत्र कंपन्यांमध्ये विभाजित करण्याच्या निर्णयाला मान्यता दिली. गुरुवारी पार पडलेल्या संचालक मंडळाच्या बैठकीत यावर शिक्कामोर्तब करण्यात आले असून, या प्रक्रियेसाठी १२ ते १५ महिन्यांचा कालावधी लागण्याची शक्यता आहे.
टाटा मोटर्सच्या संचालक मंडळाने टीएमएल, टीएमएल कमर्शिअल व्हेइकल्स लिमिटेड (टीएमएलसीव्ही), टाटा मोटर्स पॅसेंजर व्हेइकल्स लिमिटेड (टीएमपीव्ही) या संमिश्र योजनेला मान्यता दिली. टीएमएलसीव्हीमध्ये वाणिज्य वाहन व्यवसायाच्या विलयास संचालक मंडळाने मान्यता दिली आणि प्रवासी वाहने, विद्युतशक्तीवर चालणारी वाहने आणि जेएलआर यासह प्रवासी वाहन व्यवसायासाठी दुसऱ्या कंपनीची योजना आहे. म्हणजेच विद्यमान टाटा मोटर्सचे दोन भाग होऊन दोन स्वतंत्र कंपन्या अस्तित्वात येतील. परिणामी टाटा मोटर्सच्या भागधारकांना नव्याने अस्तित्वात येणाऱ्या दोन्ही कंपन्यांचे समभाग प्राप्त होतील. या दोन्ही कंपन्या भांडवली बाजारात स्वतंत्र नावाने सूचिबद्ध असतील.
हेही वाचा >>>इन्फोसिसला ३२,००० कोटी ‘जीएसटी’ भरण्याची नोटीस, जुलै २०१७ ते २०२२ कालावधीसाठी कर चुकवल्याचा आरोप
नफ्यात भरीव वाढ
टाटा मोटर्सला जूनअखेर तिमाहीत ५,५६६ कोटी रुपयांचा निव्वळ नफा झाला. त्यात वार्षिक तुलनेत ७४ टक्क्यांची वाढ झाली आहे. तर महसूल ५.७ टक्क्यांनी वाढून १,०७,३१६ कोटींवर पोहोचला आहे.
