बँकांचे ठेवी दर ८ टक्क्यांपुढे

देशातील बँकिंग क्षेत्राला सध्या मालमत्ता आणि दायित्व यातील विसंगतीच्या समस्येचा सामना करावा लागतो आहे. त्यामुळे कर्जावरील व्याजदरापाठोपाठ सार्वजनिक आणि खासगी क्षेत्रातील बँकांनी आता ठेवींवरील व्याजदर वाढविण्यास सुरुवात केली आहे. यामध्ये पंजाब अँड सिंध बँकेने ठेवींवर सर्वाधिक असा ८ ते ८.५० टक्के दर देऊ केला आहे. बँकांना २०० ते ८०० दिवसांच्या कालावधीसाठी चलनवाढीवर मात करणारा ठेवी दर देण्यास भाग पाडले आहे. सध्या ठेवींवर मिळणारा ७ टक्के दरदेखील सकारात्मक आहे. कारण जानेवारीमध्ये किरकोळ महागाई दर ६.५२ टक्क्यांवर पोहोचला आहे.

आर्थिक वर्ष २०२२-२३ च्या दहा महिन्यांमध्ये महागाई दर ६ टक्क्यांहून अधिक राहिला आहे आणि त्यापरिणामी रिझर्व्ह बँकेला मे २०२२ पासून लागोपाठ सहा दरवाढीद्वारे रेपोदर २५० आधार बिदूंनी वाढवत नेत ६.५० टक्क्यांपर्यंत वाढवण्यास भाग पाडले आहे. १३ जानेवारी २०१३ रोजी संपलेल्या पंधरवड्यात, १६.५ टक्के पत वाढ झाली, तर त्या तुलनेत ठेवींमध्ये केवळ १०.६ टक्के वाढ नोंदवली गेली. वर्षभरात कर्जाची मागणी सरासरी १६ टक्के, अशी दुहेरी अंकात राहिली आहे.

सार्वजनिक क्षेत्रातील बँकांचे ठेवीदर

‘ठेवी’च मुख्य स्रोत

भारतीय बँकांनी ब्रिटिश पद्धत अनुसरल्याने बँकांना थेट भांडवली बाजारातून निधी उभारणी करता येत नाही. यामुळे बँकांना निधीचा मुख्य स्रोत म्हणून ठेवींवर अवलंबून राहावे लागते.