ट्रम्प यांच्या राखीव कोशाच्या संकेतांनी बिटकॉइनमध्ये २० टक्के तेजी

समाज माध्यमावरील एका टिप्पणीत ट्रम्प म्हणाले की, त्यांच्या जानेवारीच्या कार्यकारी आदेशामुळे बिटकॉइन, इथर, एक्सआरपी, सोलाना आणि कार्डानो यासारख्या कूटचलनांचा राखीव साठा तयार होईल. ट्रम्प यांनी यापूर्वीही असे संकेत दिले असले तरी कूटचलनांचा नावांसह उल्लेख त्यांनी पहिल्यांदाच केला. बिटकॉइन आणि इथर हे या राखीव कोशाच्या केंद्रस्थानी असतील, असे त्यांनी रविवारच्या या टिप्पणीतून स्पष्ट केले.
या टिप्पणीचा परिणाम म्हणून बिटकॉइन जे शुक्रवारी नोव्हेंबरनंतरच्या नीचांकी पातळीवर रोडावले होते, ते सोमवारच्या सत्रात २० टक्क्यांनी झेप घेताना दिसून आले. ट्रम्प यांनी कूटचलनावरील नियमन शिथिल करण्याच्या आश्वासनांचे पालन न केल्यामुळे जानेवारीच्या मध्यापासून निराश झालेल्या कूटचलन बाजाराच्या भावनेलाही यातून कलाटणी मिळताना दिसून आली.

शुक्रवारच्या सत्रातील ७८,२७३ डॉलर या नीचांकी पातळीपासून, बिटकॉइनने ९१,६०५ डॉलरपर्यंत सोमवारी मुसंडी मारली. इथर देखील शुक्रवारच्या नीचांकी पातळीपासून २० टक्क्यांनी वाढून २,३५१ डॉलरवर पोहोचला. एक्सआरपी आणि सोलाना शुक्रवारच्या नीचांकी पातळीपेक्षा सुमारे ३० टक्के वर होते, तर कार्डानो गेल्या आठवड्याच्या नीचांकी पातळीपेक्षा तब्बल ६० टक्क्यांनी वर उसळला. ट्रम्प यांच्या पुनरागमनाच्या आशावादामुळे जानेवारीच्या सुरुवातीला बिटकॉइनने एक लाख पाच हजार डॉलरचा विक्रमी भाव गाठला होता. मात्र त्यानंतर प्रत्यक्षात ट्रम्प यांची या आघाडीवरील निष्क्रियता पाहता फेब्रुवारीमध्ये बिटकॉइन १७ टक्क्यांपेक्षा जास्त घसरला. जून २०२२ नंतरची ही त्याची सर्वात मोठी मासिक टक्केवारीतील घसरण होती.