डिमॅट खाती विक्रमी १०.४ कोटींपुढे; बाजार अस्थिरतेमुळे ऑगस्टपासून वाढीचा वेग मात्र मंदावला

गुंतवणुकीची प्रक्रिया कागदरहित हाताळली जाण्यासह, समभाग वा रोख्यांच्या इलेक्ट्रॉनिक स्वरूपातील जतनासाठी डिमॅट खाती उपयुक्त आहेत. भारतात सध्या कार्यरत असलेल्या एनएसडीएल आणि सीडीएसएल या दोन डिपॉझिटरी संस्था आहेत, ज्यांच्याकडे गुंतवणूकदारांना डिमॅट खाते उघडता येते. सीडीएसएल सात कोटी सक्रिय डिमॅट खात्यांसह देशातील सर्वात मोठी डिपॉझिटरी आहे. रशिया आणि युक्रेन युद्धामुळे जागतिक पातळीवर निर्माण झालेला भू-राजकीय तणाव आणि वाढत्या महागाईमुळे जगभरातील बाजारांसह देशांतर्गत भांडवली बाजारात अस्थिरता असल्याने गुंतवणूकदारांनी सावध पवित्रा घेतला, त्या परिणामी गुंतवणूकदारांकडून नवीन डिमॅट खाती उघडण्याचा वेग कमी झाला. मात्र दीर्घकाळात बाजारात तेजी परतेल, असा आशावाद मोतीलाल ओसवाल फायनान्शिअल सव्‍‌र्हिसेसचे वरिष्ठ उपाध्यक्ष (संशोधन – बँकिंग आणि विमा, संस्थात्मक इक्विटी) नितीन अग्रवाल यांनी व्यक्त केला.

वाढीचा वेग मंदावला

डिमॅट खात्यांची एकूण संख्या वाढत असली तरी चालू वर्षांत ऑगस्टपासून मात्र त्याला उतरती कळा लागली आहे. ऑगस्ट २०२२ मध्ये २६ लाख नवीन खाती उघडण्यात आली होती. सप्टेंबर महिन्यात २० लाख, तर सरलेल्या ऑक्टोबर महिन्यात केवळ १८ लाख नवीन डिमॅट खाती उघडण्यात आली. गेल्या वर्षी, ऑक्टोबर २०२१ मध्ये ३६ लाख डिमॅट खात्यांची नव्याने भर पडली. यंदाच्या ऑक्टोबर महिन्यात सणासुदीच्या काळात बाजाराचे कामकाज केवळ १८ दिवस सुरू होते. आधीच्या सप्टेंबर महिन्यात २२ दिवस कामकाज सुरू राहिले, हेदेखील या महिन्यांमध्ये तुलनेने कमी डिमॅट खाती उघडली जाण्याचे कारण असावे.