नवी दिल्ली, पीटीआय : देशातील वाहननिर्मिती क्षेत्रातील आघाडीच्या टाटा मोटर्सने प्रवासी वाहनांच्या किमतीत सरासरी ०.६ टक्के वाढ करण्याचा निर्णय शुक्रवारी जाहीर केला. येत्या १ मेपासून प्रवासी वाहनांच्या प्रकार आणि श्रेणीनुसार किंमतवाढ होणार आहे. वाहननिर्मितीसाठी येणाऱ्या खर्चात वाढ आणि बीएस ६ च्या नियामक बदलांमुळे एकूण खर्चात वाढ झाल्याने वाहनांच्या किमती वाढविण्याचा निर्णय घ्यावा लागल्याचे कंपनीकडून सांगण्यात आले.
निर्मितीच्या विविध टप्प्यांवर वाढलेला सामग्री खर्च पाहता किमती वाढविणे भाग ठरले. मात्र ग्राहकांवर कमीत कमी भार पडावा असे प्रयत्न केले गेले आहेत, असेही कंपनीकडून सांगण्यात आले. कंपनी देशांतर्गत बाजारात टियागो, टिगोर, अल्ट्रोझ, नेक्सॉन, हॅरियर, सफारी आणि पंच यांसारख्या विविध वाहनांची विक्री करते, ज्यांच्या किमती ५.५४ लाख आणि २५ लाख रुपये आहेत.
विद्यमान कॅलेंडर वर्षात टाटा मोटर्सकडून प्रवासी वाहनांच्या किमतीमध्ये दुसऱ्यांदा वाढ करण्यात आली आहे. याआधी फेब्रुवारी महिन्यात किमती वाढविण्यात आल्या होत्या. या वर्षाच्या सुरुवातीला, कंपनीने प्रवासी वाहनांच्या आयसी इंजिन असणाऱ्या श्रेणीतील वाहनांच्या किमती सरासरी १.२ टक्क्यांनी वाढवल्या होत्या. तर १ एप्रिलपासून वाणिज्य वापराच्या वाहनांच्या किमतीत २ ते २.५ टक्के वाढ केली आहे.
