Gold Smuggling In India : देशात सोन्याच्या तस्करीत वाढ झाली असून, त्यानंतर भारतात तस्करीच्या सोन्याच्या जप्तीतही मोठी वाढ झाली आहे. चालू आर्थिक वर्ष २०२३-२४ च्या एप्रिल-सप्टेंबर या महिन्यांत तस्करीच्या सोन्याच्या जप्तीत ४३ टक्क्यांनी वाढ होऊन २ हजार किलोपर्यंत सोन्याचे प्रमाण वाढले आहे. भारतात सर्वाधिक सोन्याची तस्करी म्यानमार, नेपाळ आणि बांगलादेशच्या सीमेवरून होत आहे.
६ महिन्यांत सोन्याच्या जप्तीत ४३ टक्के वाढ
CBIC (केंद्रीय अप्रत्यक्ष कर आणि कस्टम बोर्ड) चे अध्यक्ष संजय कुमार अग्रवाल यांनी सांगितले की, २०२२-२३ च्या एप्रिल-सप्टेंबर दरम्यान एकूण १४०० किलो सोने जप्त करण्यात आले होते, तर चालू आर्थिक वर्षाच्या पहिल्या सहा महिन्यांत २ हजार किलो सोने जप्त करण्यात आले होते, जे ४३ टक्के अधिक आहे. तर २०२२-२३ या आर्थिक वर्षात सुमारे ३८०० किलो सोने जप्त करण्यात आले होते. संजय अग्रवाल म्हणाले की, सोन्याच्या आयात शुल्कात कोणताही बदल झालेला नाही, तरीही देशात सोन्याची तस्करी वाढली आहे. सोन्याची तस्करी हे किमतीत मोठी झेप घेण्याचे कारण असू शकते, अशी भीती त्यांनी व्यक्त केली.
हेही वाचाः ऑनलाइन गेमिंग कंपन्यांना आतापर्यंत १ लाख कोटींच्या GST कारणे दाखवा नोटिसा जारी, कारण काय?
म्यानमार आणि बांगलादेश हे तस्करीसाठी सोयीचे मार्ग
डीआरआयने २०२१-२२ च्या आपल्या अहवालात असेही म्हटले होते की, देशात सोन्याच्या तस्करीत मोठी वाढ झाली आहे. म्यानमार आणि बांगलादेश सीमा तस्करांसाठी सर्वात सोयीचा मार्ग बनला आहे. अहवालानुसार, २०२१-२२ मध्ये, DRI ने ४०५.३५ कोटी रुपयांच्या समतुल्य ८३३.०७ किलो सोने जप्त केले होते. ज्यामध्ये सर्वाधिक ३७ टक्के सोने म्यानमारचे आहे. तर पूर्वी पश्चिम आशियातील सोन्याच्या तस्करीत मोठा वाटा असायचा. म्यानमार आणि बांगलादेशमार्गे भारतात ७३ टक्के सोन्याची तस्करी होते. सोन्याची सर्वाधिक तस्करी ईशान्येकडील राज्य मणिपूरमधून होत आहे.
आयात शुल्क प्रचंड वाढले
सोन्याची तस्करी वाढण्याचे मुख्य कारण म्हणजे देशात सोन्यावर लादलेले प्रचंड आयात शुल्क आहे. सोन्याची आयात रोखण्यासाठी सरकारने १ जुलै २०२२ रोजी सोन्यावरील आयात शुल्क ७.५ टक्क्यांवरून १२.५० टक्के केले. सोन्यावर २.५० टक्के कृषी पायाभूत सुविधा विकास उपकर आणि ३ टक्के IGST स्वतंत्रपणे भरावा लागेल. एकूणच सोन्याच्या आयातीवर १८.४५ टक्के कर भरावा लागतो, त्यामुळे आयात शुल्क भरू नये म्हणून देशात सोन्याची तस्करी वाढली आहे.
