ह्युंदाईच्या ‘महा-आयपीओ’साठी प्रत्येकी १,८५६ ते १,९६० रुपयांचा किंमतपट्टा, पुढील आठवड्यात गुंतवणूकदारांना आजमावणार!

वृत्तसंस्था, नवी दिल्ली
ह्युंदाई मोटर इंडियाची बहुप्रतिक्षित प्रारंभिक समभाग विक्री (आयपीओ) गुंतवणूकदारांसाठी पुढील आठवड्यात खुली होईल. यासाठी प्रति समभाग किंमतपट्टा १,८५६ ते १,९६० रुपये राहण्याचा अंदाज व्यक्त होत आहे, अशी माहिती सूत्रांनी दिली. दक्षिण कोरियातील मोटार निर्मिती कंपनी ह्युंदाईची उपकंपनी असलेली ह्युंदाई मोटार इंडिया या आयपीओच्या माध्यमातून २५ हजार कोटी रुपये उभारणार आहे. भांडवली बाजारात कंपनी सूचिबद्ध झाल्यानंतर तिचे बाजारमूल्य १९ अब्ज डॉलरवर जाण्याचा अंदाज आहे. यामुळे हा देशातील आजवरची सर्वांत मोठी निधी उभारणी ठरणार आहे. हा आयपीओ संस्थात्मक गुंतवणूकदारांसाठी १४ ऑक्टोबरला खुला होईल. त्यानंतर किरकोळ व इतर गुंतवणूकदारांसाठी ते १५ ते १७ ऑक्टोबरदरम्यान खुला असेल. कंपनीचे समभाग २२ ऑक्टोबरला मुंबई शेअर बाजार आणि राष्ट्रीय शेअर बाजारात सूचिबद्ध होणे अपेक्षित आहे.