खाणकाम, निर्मिती क्षेत्रात मरगळ कायम; औद्योगिक उत्पादनाचा वेग जुलैमध्ये मंदावला

नवी दिल्ली : देशातील औद्योगिक उत्पादनाचा वेग सरलेल्या जुलै महिन्यात ४.८ टक्क्यांवर घसरला. खाणकाम आणि निर्मिती क्षेत्राची खराब कामगिरी याला कारणीभूत ठरल्याचे गुरूवारी जाहीर झालेल्या सरकारी आकडेवारीतून समोर आले. देशातील कारखानदारीतील सक्रियतेचे मापन असलेला औद्योगिक उत्पादन निर्देशांक गुरूवारी राष्ट्रीय सांख्यिकी कार्यालयाने जाहीर केला. यानुसार, जुलैमध्ये औद्योगिक उत्पादनाचा वाढीचा दर ४.८ टक्के नोंदवला गेला. गेल्या वर्षी जुलै महिन्यात हा दर ६.२ टक्के होता.