पुणे : किरकोळ गुंतवणूकदारांसाठी भांडवली बाजार हे दीर्घ मुदतीच्या गुंतवणुकीचे साधन बनायला हवे. तथापि कथित गुंतवणूक गुरूंच्या सांगण्यानुसार निर्णय घेतल्याने गुंतवणूकदार तोटा करून बसतात आणि परिणामी या गुंतवणूक पर्यायाकडेच ते पाठ करतात. त्यामुळे सावधगिरी, संयम, सातत्य आणि प्रसंगावधान गुंतवणूकदारांनी राखलेच पाहिजे, असा सल्ला राष्ट्रीय शेअर बाजाराचे (एनएसई) व्यवस्थापकीय संचालक आणि मुख्य कार्यकारी अधिकारी आशीषकुमार चौहान यांनी दिला.
मुंबईतील ‘एनएसई’च्या मुख्यालयात काही निमंत्रित माध्यम प्रतिनिधींशी चौहान यांनी संवाद साधला. अनेक तथाकथित गुंतवणूक गुरू समाज-माध्यमातून गुंतवणूकदारांना भांडवली बाजारातून निश्चित परतावा मिळवून देण्याचा सल्ला देतात. त्यांचा सल्ला ऐकून फसवणूक करून घेणाऱ्या किरकोळ गुंतवणूकदारांचे प्रमाण खूप आहे. या पार्श्वभूमीवर बोलताना चौहान यांनी भांडवली बाजारातील ज्ञान, अनुभव कमावण्यासह, किरकोळ गुंतवणूकदारांनी या गुंतवणूक पर्यायाकडे वळताना सावधगिरी आणि संयम बाळगणे अत्यावश्यक असल्याचा सल्ला दिला.
चौहान म्हणाले की, कोणत्याही अर्थ सल्लागारावर सर्वस्वी विसंबून गुंतवणूक करू नये. फसवी जाहिरात पाहून अथवा मोबाइल फोनवर आलेल्या टिप्सच्या आधारे भांडवली बाजारात पैसा गुंतवू नये. अशा प्रकारची गुंतवणूक ही जोखमीची ठरेल. प्रत्यक्षात यातून अनेक गुंतवणूकदारांना तोटाही होत आहे. त्यामुळे दीर्घकालीन गुंतवणूक म्हणून भांडवली बाजारात पैसे गुंतवावेत. तसेच बरोबरीने म्युच्युअल फंडांचा पर्यायही गुंतवणूकदारांना उपलब्ध आहे. आपल्याकडे भांडवली बाजारासंबंधी पुरते ज्ञान असेल तरच दैनंदिन व्यवहार अर्थात ‘डे ट्रेडिंग’चा पर्याय आजमावला जावा, असेही त्यांनी सुचविले.
भांडवली बाजारात समभाग गुंतवणूक करताना, त्या कंपनीची आर्थिक स्थिती, व्यवस्थापन, राष्ट्रीय व आंतरराष्ट्रीय घडामोडी या सर्व बाबींचा अभ्यास करावा लागतो. तुमच्याकडे यासाठी वेळ आहे का? तुमच्याकडे वेळ नसेल तर लांबच्या कालावधीसाठी सुरक्षित पर्यायात पैसे गुंतवणे उत्तम, त्यांनी ‘डे ट्रेडिंग’च्या नादी लागू नये. – अशीषकुमार चौहान, व्यवस्थापकीय संचालक व मुख्याधिकारी, राष्ट्रीय शेअर बाजार