मुंबई : औषधी निर्माण क्षेत्रातील आघाडीची कंपनी असलेल्या मॅनकाइंड फार्माची प्रारंभिक समभाग विक्री (आयपीओ) येत्या २५ एप्रिलपासून सुरू होणार आहे. पुढील तीन दिवस म्हणजे २७ एप्रिलपर्यंत गुंतवणूकदारांना या समभाग विक्रीत सहभागी होता येईल. तर सुकाणू गुंतवणूकदारांना २४ एप्रिल रोजी समभाग खरेदीसाठी अर्ज करता येईल.
पुढील महिन्यात ९ मे रोजी कंपनीचे समभाग मुंबई शेअर बाजार (बीएसई) आणि राष्ट्रीय शेअर बाजारात (एनएसई) सूचिबद्ध केले जाणे अपेक्षित आहे. कंपनीने समभाग विक्रीसाठी १०२६ रुपये ते १०८० रुपये असा किंमतपट्टा निश्चित केला आहे.
कंपनीचे प्रवर्तक आणि विद्यमान भागधारक त्यांच्या हिस्सेदारीतील आंशिक वाटा असे सुमारे ४ कोटी समभागांची यातून विक्री करणार आहेत. कंपनीचे प्रवर्तक रमेश जुनेजा, राजीव जुनेजा आणि शीतल अरोरा यांच्या मालकीचे अनुक्रमे ३७ लाख, ३५ लाख आणि २८ लाख समभाग विकले जाणार आहेत. शिवाय, केर्नहिल सीआयपीईएफ, केर्नहिल सीजीपीई, बेज लिमिटेड आणि लिंक इन्व्हेस्टमेंट ट्रस्ट हे विद्यमान भागधारकदेखील त्यांचे समभाग विकत आहेत. समभाग विक्रीतून मिळणारा निधी हा पूर्णपणे कंपनीचे प्रवर्तक आणि विद्यमान भागधारकांना मिळणार आहे.
मॅनकाइंड फार्मा ही मुख्यतः ग्राहक आरोग्य सेवा उत्पादनांशी निगडित विविध श्रेणींतील फार्मास्युटिकल फॉर्म्युलेशन विकसित करून, त्याचे उत्पादन आणि विपणनांत गुंतलेली आहे. शिवाय कंडोम, गर्भधारणा ओळखण्यासाठी किट, आपत्कालीन गर्भनिरोधक गोळ्या, अँटासिड पावडर, जीवनसत्त्व आणि खनिज पूरक औषधे ती तयार करते. देशभरात २५ ठिकाणी तिचे उत्पादन प्रकल्प कार्यरत आहेत. डिसेंबर २०२२ पर्यंत, कंपनीकडे ६०० हून अधिक शास्त्रज्ञ काम करतात. शिवाय कंपनीची मानेसर, गुरुग्राम (हरियाणा) आणि ठाणे (महाराष्ट्र) येथे विकास आणि संशोधन केंद्रदेखील आहेत.
