पेटीएमचा चित्रपट तिकीट व्यवसाय झोमॅटोकडे

झोमॅटोने याबाबत भांडवली बाजाराला नियमानुसार प्रगटन या स्वरूपात दिलेल्या माहितीत, पेटीएमसोबत सध्या या व्यवहारावर चर्चा सुरू असल्याचे स्पष्ट केले आहे. तथापि या संबंधाने अद्याप कोणताही निर्णय झालेला नाही. संचालक मंडळ आणि इतर आवश्यक मंजुरीचे सोपस्कारही पूर्ण करावेत, अशा टप्प्यावर हा व्यवहार अद्याप पोहोचलेला नाही. कंपनी तोट्यातील व्यवसायांमध्ये सुधारणा करीत आहे. झोमॅटोने सध्या चार मुख्य व्यवसायांवर लक्ष केंद्रित केले असल्याचे म्हटले आहे.  

हेही वाचा >>>सर्वात महागड्या शहरांच्या यादीत मुंबई आशियातून २१ व्या स्थानावर, पुण्यासह अन्य शहरं कितव्या स्थानी?

झोमॅटोने २०२१ मध्ये ब्लिंकिट ही कंपनी ताब्यात घेतली होती. हा व्यवहार ४,४४७ कोटी रुपयांच्या मोबदल्यात झाला होता. आता कंपनी पेटीएमचा चित्रपट तिकीट आणि कार्यक्रम व्यवसाय विकत घेण्याच्या तयारीत आहे. पेटीएमला नवीन भागीदारी करण्यास नियामकांनी मंजुरी दिलेली आहे. पेटीएमच्या चित्रपट तिकीट व कार्यक्रम व्यवसायाच्या माध्यमातून वार्षिक विक्री मार्चअखेर संपलेल्या २०२३-२४ आर्थिक वर्षात १,७४० कोटी रुपये होती.